रुकुम पश्चिम — मुसिकोट नगरपालिका–१ स्थित जिल्ला सदरमुकामको मुख्य बजार क्षेत्र प्रवेश गर्नेनिरै भत्किएको सडक मर्मत नहुँदा जोखिम बढेको छ । 

राप्ती लोकमार्गबाट छेउमा रहेको सहिद गेट र पुष्पलाल चोकको बिचमा गत भदौ १३ गते पहिरो झरेको थियो । बर्खे झरीका कारण त्यस दिन उक्त सडक भासिनुका साथै पोल भाचिँदा विद्युत् प्रसारण लाइनमा समेत असर परेको थियो भने तलपट्टी सहिद मैदानमा निर्माणाधीन बहुतले पार्किङ भवनमा पनि असर परेको थियो । त्यतिबेला विद्युत् मर्मत गरिए पनि सडक अहिलेसम्म मर्मत हुन सकेको छैन । 

भिरालो जमिन भित्रैदेखि कमजोर भएपछि त्यसयता हल्का सवारी साधनहरु मात्रै बजार प्रवेश गरिरहेका छन् भने यसमा पनि जोखिम छ । तत्काल नगरपालिकाले मर्मतको काम गर्ने आशा गरिए पनि अहिलेसम्म काम हुन नसकेको भन्दै स्थानीय निमबहादुर पुनले गुनासो गरे । ‘त्यत्ति ठूलो पहिरो पनि यो होइन । तर गाडी र मान्छेको भिडभाड हुने र मुख्य बजार नजिकको यो सडक एक महिना बितिसक्दा पनि किन मर्मत नभएको होला ?’ प्रश्न गर्दै उनले भने ।