सुर्खेत — जुम्ला र रुकुम पश्चिम कारागारबाट भागेका २९ कैदीबन्दी अझै फर्किएका छैनन् । रुकुम पश्चिमबाट ८८ र जुम्लाबाट ३६ जना कैदीबन्दी भागेका थिए ।

फरार भएकामध्ये अधिकांश फौजदारी अभियोगका छन् । फरार अभियुक्तहरु जरबरजस्ती करणी, कर्तव्य ज्यान र ज्यान मार्ने उद्योग, हातहतियार खरखजाना र लागुऔषध मुद्दाका छन् । 

रुकुम पश्चिमस्थित कारागारबाट भागेका ८८ जना कैदीबन्दी मध्ये ६९ जना पक्राउ परेका छन् । त्यसमध्ये १६ जना अझै कारागारमा नफर्किएको रुकुम पश्चिमका प्रमुख जिल्ला अधिकारी दिनेशप्रसाद थानीले बताए । उनका अनुसार जिल्ला प्रशासन कार्यालयले असोज १२ गते सार्वजनिक सूचना जारी गरी २० गतेभित्र कारागारमा फर्किन आग्रह गरेको थियो । त्यसयता ५ जना मात्र फर्किएको उनको भनाइ छ ।

‘सबैजसो फरार कैदीबन्दी जघन्य अपराधमा संलग्न छन्, जसका कारण समाजमा थप अप्रिय घटना हुन सक्ने जोखिम छ,’ उनले भने, ‘सबैतिर खोजी तीव्र पारेका छौ, अब कैदीबन्दीलाई लुकाउने, छिपाउने र आश्रय दिने व्यक्तिलाई समेत कसुरदारी ठानी कानुनअनुसार कारबाहीको दायरामा ल्याइनेछ ।’ रुकुम पश्चिमबाट फरार भएकामध्ये केही रुकुम पूर्वका छन् । रुकुम पूर्वमा कारागार नभएकाले उनीहरुलाई रुकुम पश्चिमको कारागारमा राखिएको थियो । 

जुम्लाका प्रमुख जिल्ला अधिकारी केदारनाथ शर्माका अनुसार भागेका सबै कैदीबन्दी जरबरजस्ती करणी, कर्तव्य ज्यान र ज्यान मार्ने उद्योगमा मुद्दा चलिरहेका र सजाय भुक्तान गरिरहेका हुन् । उनका अनुसार मुगुका ५, जुम्लाका ३ र हुम्लाका २ जना कारागारको सम्पर्कमा आएका छैनन् ।