राउटे महिलाले नै आफूलाई जबरजस्ती गर्न खोजेको बताएपछि बस्तीकै युवाहरुले समातेर राखेका थिए ।
काठमाडौँ — शुक्रबार राति साढे १२ सुर्खेतको लेकबेशी नगरपालिका–९ चौरासे नजिकैको जंगलमा बस्दै राउटे समुदायमा मदिरा सेवन गरी पसेका एक युवकलाई पक्राउ गरी प्रहरीको जिम्मा लगाइएको छ ।
नगरपालिकाको–५ नेटाका राजु रजालीलाई राउटे युवाहरुले पक्राउ गरेर प्रहरीको जिम्मा लगाएका हुन् । महिला एक्लै भएको छाप्रोमा प्रवेश गरेका उनलाई राउटे युवाहरूले नियन्त्रणमा लिएका थिए ।
राउटे समुदायसँग काम गर्दै आएकी कर्मचारी दुर्गा खत्रीले मदिराले लठ्ठ बनेका युवकले महिलामाथि जवजस्ती गर्न खोजेपछि राउटे युवाहरूले नियन्त्रणमा लिएर प्रहरीलाई बुझाएका बताइन् । राउटे महिलाले नै आफूलाई जबरजस्ती गर्न खोजेको बताएपछि बस्तीकै युवाहरुले समातेर राखेका थिए ।
जिल्ला प्रहरी कार्यालय सुर्खेतका डिएसपी मोनजंग बुढथापाले शनिबार बिहान बस्तीमै पुगेर प्रहरीले नियन्त्रणमा लिएको बताए । पक्राउ परेका युवकबारे थप अनुसन्धान भइरहेको उनको भनाइ छ ।
घटनाबारे जानकारी लिन राष्ट्रिय मानव अधिकार आयोग र अनौपचारिक क्षेत्र सेवा केन्द्र (इन्सेक) को टोली बस्तीमा पुगेको छ ।
