बझाङ — बझाङमा लागुऔषध कारोबारको आरोपमा डाक्टर र स्ववियु सभापति पक्राउ परेका छन् । पक्राउ पर्नेमा जिल्ला अस्पतालमा कार्यरत डाक्टर मिलनराज जोशी र जयपृथ्वी क्याम्पसका स्ववियु सभापति तिलकचन्द्र बोहरा रहेका छन् । उनीहरुलाई मंगलबार साँझ पक्राउ गरिएको हो । 

गत भदौ ५ गते ४ सय ५० मिलिग्राम ब्राउन सुगरसहित पक्राउ परेका विशाल रावलको सम्पर्क पछ्याउँदै जाँदा प्रहरीले जोशी र बोहरालाई पक्राउ गरेको हो । रावल जयपृथ्वी नगरपालिका–९ चिउडीखान भन्ने ठाउँमा ग्रिल उद्योग संचालन गर्ने व्यक्ति हुन् । ‘रावलकै कल डिटेल, मेसेन्जर र हृवाट्स एपमा गरेको कुराकानीका आधारमा जोशी र बोहराको कनेक्सन पक्ता लागेको हो,' जिल्ला प्रहरी कार्यालय प्रमुख खगेन्द्र धमलाले भने, ‘अहिलेसम्मको अनुसन्धानले उनीहरु लागुऔसध प्रयोगकर्ता भएको बुझिएको छ । थप अनुसन्धान भैरहेको छ ।' उनका अनुसार भारतबाट धनगढी हुँदै ब्राउन सुगर बझाङ ल्याई बिक्री विरतण गर्ने गरेको छ । 

यस्तै पक्राउ परेका व्यक्तिको बयानका आधारमा बुधबार दिउँसो जयपृथ्वी नगरपालिका-१० का अर्का फरार व्यक्तिको घरमा समेत प्रहरीले खानतलासी गरेको थियो । उनको घरबाट एक हजार दरका १९ वटा नक्कली नोट भेटिएको छ । नकक्ली नोट पक्राउ परेका तिलकचन्द्र बोहराले ल्याएर राख्न दिएको भन्ने बयान घरधनीले दिएको डीएसपी घमलाले जानकारी दिए । ‘केही व्यक्ति अझै फरार छन् । नक्कली नोटको समेत कारोबारमा संलग्न भेटिएपछि यो विषयमा अझ फराकिलो ढंगले अनुसन्धान भैरहेको छ,' धमलाले भने ।