जुम्ला — कर्णाली राजमार्ग अन्तर्गत जुम्ला खण्डमा ढुंगा खसेर बाटो अवरुद्ध हुँदा यातायात सेवा अवरुद्ध भएको छ । तिला गाउँपालिका–१ स्थित सडकमा बिहान ८ बजे सडक माथिबाट ठूलो ढुंगा खसेको थियो ।

ढुंगाले पुरै सडक ओगटेपछि यातायात सेवा रोकिएको सडक डिभिजन कार्यालय जुम्लाले जनाएको छ । सडकमा मोटरसाइकल लगायतका सानो सवारीसाधन आवतजावत भइरहेको भए पनि ठूला सवारीसाधन चल्न नसकेको डिभिजन प्रमुख इन्जिनियर दीपेन्द्रकुमार चौधरीले जानकारी दिए ।

उनका अनुसार रारालिहीदेखि नाग्मसम्मको सडक पहिरोको उच्च जोखिममा रहेको छ । जिल्ला प्रहरी कार्यालय जुम्लाका प्रमुख डिएसपी रविनबाबु रेग्मीले आधा घण्टादेखि सडकमा ठूला सवारीसाधन चल्न नसकेको बताए । 

उनले भने, ‘साना ढुंगाहरु प्रहरीले हटाइसकेका छन् । ठूलो ढुंगा हटाउन डोजर लगाउनुपर्ने देखिन्छ ।’ डोजर ढुंगा खसेको स्थान नजिकै रहे पनि चालक सदरमुकाम खलंगामा आएको ढुंगा हटाउने कार्य सुरु हुन सकिरहेको छैन । डिएसपी रेग्मीले भने, ‘चालकलाई खबर भइसकेको छ । अबको केही समयभित्रै ढुंगा पन्छाउने काम सुरु हुनेछ ।’