सल्यान — जंगली जनावर बँदेलले जिल्लाका विभिन्न पालिकामा लगाइएको मकैबाली नष्ट गरेपछि किसान चिन्तामा परेका छन् ।शारदा नगरपालिका-५ रानीकोट, ६ को सापमारा, ७ को ओखरेनी तथा बन्गाड कुपिण्डे नगरपालिका-१२ को निगालचुला, ६ को आमखोली, कुमाख गाउँपालिका-५ को कालागाउँ, ६ को बडागाउँ, छत्रेश्वरी गाउँपालिका-२ खोरबारे लगायतका ठाउँमा बँदेलले क्षति पुर्‍याएको हो ।

कपुरकोट गाउँपालिकाको विभिन्न वडा र कालिमाटी गाउँपालिका-१ लक्ष्मीपुर आसपासका क्षेत्रमा पनि मकैबाली नष्ट भएको छ ।विभिन्न पालिकामा गरी तीन सय रोपनीभन्दा बढी जग्गामा लगाएको मकैबाली बँदेलले स्वाहा पारेको हो । 

विगतका वर्षमा जस्तै यसपालि पनि बँदेलले मकैबालीमा क्षति पुर्‍याएपछि २ सयभन्दा बढी किसान प्रभावित भएका छन् । मकैबाली उत्पादन गरेर वर्षमा चार महिना जीविकोपार्जन गर्दै आएका जिल्लाका किसान अब कसरी घर खर्च चलाउने भन्ने पिरलोमा छन् ।

दुई रोपनीमा लगाएको मकै घोगा लागेको अवस्थामा बँदेलले स्वाहा पारेको छत्रेश्वरी-२ खोरबारेका किसान बालाराम ओलीले बताए । बथानमा आउने बँदेलले गाउँले सबैको मकैमा क्षति पुर्‍याएको उनले बताए । ‘बँदेलबाट मकैबाली जोगाउन दिनभर पहरा दिँदै आएका छौं तर रातमा बस्न सक्दैनौं,' उनले भने, 'हुल बाँधेर बँदेल राति आउँछन् । बिहान पुग्दा सबै सखाप बनाइसकेको हुन्छ ।'