त्रिपुरासुन्दरी मन्दिरसहित तटीय बस्ती कटानको जोखिममा
What you should know
डोल्पा — डोल्पाको त्रिपुरासुन्दरी नगरपालिका १ मा रहेको छलगार्ड खोलाको बाढीका कारण त्रिपुराकोटमा रहेको ठूलीभेरी नदी नै थुनिएको छ ।
बिहीबार बेलुकीको समयमा खोलामा आएको बाढीले शुक्रबार पनि भेरी नदी आंशिक रूपमा थुनिएको हो ।
खोलाले ल्याएको ढुंगा र माटोले भेरी नदी नै आंशिक थुनिएपछि तटीय क्षेत्रको त्रिपुराकोट बजार क्षेत्रको तल्लो भाग, लोँका बस्ती, प्रसिद्ध शक्तिपिठ त्रिपुरासुन्दरी मन्दिरको तल्लो भाग र स्थानीयका खेतबारीसमेत जोखिममा परेकाछन् ।
बिहीबारको बाढीपछि प्रहरी चौकी त्रिपुराकोटले जोखिम क्षेत्रका बासिन्दालाई सतर्क हुन आग्रह गरेको छ ।
बाढीका कारण छलगार्ड लघु जलविद्युत्को करिब दुई सय मिटर बाँध भत्किएपछि वडा नं १ मा पर्ने त्रिपुराकोट, करेलीकााडा र रल्लीका तीन सय पचास घरधुरी विद्युत् सेवाबाट बञ्चित भएका छन् ।
लोँका बस्तीलाई जोड्ने काठेपुल र दुईवटा पानीघट्टको बाँध पूर्ण रूपमा बगाएको त्रिपुराकोटका स्थानीय युवा पूर्ण सार्कीले जानकारी दिए ।
यससँगै एक्कासि आएको भीषण बाढीले भलायडाँडामा रहेको करिब पाँच रोपनी क्षेत्रमा लगाइएको सिमीखेत, दुई कोठे गाइगोठ र एउटा ट्र्याक्टर समेत बगाएको उनको भनाइ छ ।
त्रिपुराकोटमा रहेको सार्की टोललाई बाढी र पहिरोबाट जोगाउन लगाइएको तटबन्ध समेत भत्काएको छ ।
प्रहरी चौकी त्रिपुराकोटका प्रहरी नायब निरीक्षक यामबहादुर बस्नेतले बिहीबारको बाढीले भेरी थुनिनुका साथै स्थानीयको जग्गा समेत बगाएले प्रहरीले जोखिम क्षेत्रका स्थानीयलाई सतर्क रहन आग्रह गरेको बताए ।
‘बिहीबार छलगार्ड खोलामा ठूलो बाढी आएको थियो,जसका कारण छलगार्ड लघु जलविद्युत्को नगर, करेलीकाँडा जोड्ने विद्युत् लाइनको एउटा पोल र घट्ट बगायो,’ सई बस्नेतले भने, ‘आज बहाव त घटेको छ, उक्त खोलाले ल्याएको ठूलाठूला ढुङ्गाहरु भेरीको मूलमार्गमै रहेकाले आंशिक रूपमा भेरी थुनिएको छ, अझै जोखिम कायमै छ ।’
बाढीका कारण उक्त खोलामा बन्न लागेको पक्की पुलको दुवैतीरको पिल्लरमा समेत क्षति पुर्याएको बताइएको छ ।
