चार महिनादेखि रिक्त रहेको कर्णाली स्वास्थ्य विज्ञान प्रतिष्ठानको उपकुलपति पदमा डा. पुजन रोकायाको नियुक्ति भएको हो।
जुम्ला — कर्णाली स्वास्थ्य विज्ञान प्रतिष्ठान जुम्लाको उपकुलपतिमा डा. पुजनकुमार रोकाया नियुक्त भएका छन् । उनी चौथो उपकुलपतिका रुपमा नियुक्त भएका हुन् ।
मंगलबार प्रतिष्ठानका कुलपति तथा प्रधानमन्त्री केपी शर्मा ओलीले रोकायालाई उपकुलपतिका रुपमा नियुक्त गरेका थिए । गत चैत महिनामा तत्कालीन उपकुलपति डा. मंगल रावलको कार्यकाल सकिएपछि कर्णाली स्वास्थ्य विज्ञान प्रतिष्ठानको उपकुलपति पद रिक्त थियो ।
प्रतिष्ठानले चार महिना पनि उपकुलपति पाएको हो । डा. रोकाया दोस्रो प्रयासमा उपकुलपतिमा नियुक्त भएका हुन् । अघिल्लो कार्यकालमा उपकुलपति पदका लागि डा. रोकायाको पनि दाबी थियो । प्रतिष्ठानका सहकुलपति स्वास्थ्यमन्त्रीले नाम सिफारिस गर्दा पनि उनी उपकुलपति हुन सकेका थिएनन् ।
डा. रोकाया विगत १२ वर्षदेखि कर्णाली स्वास्थ्य विज्ञान प्रतिष्ठान, शिक्षण अस्पताल जुम्लामा हाडजोर्नी तथा नशारोग विशेषज्ञको रुपमा कार्यरत छन् । जि. एम. डी. मोर्डन पब्लिक हाई स्कुल जुम्लाबाट एसएलसी उत्तीर्ण डा. रोकायाले बीपी कोइराला स्वास्थ्य विज्ञान प्रतिष्ठान धरानमा दुर्गम कोटाबाट नाम निकालेर एमबीबीएस उत्तीर्ण गरेका थिए ।
डा. रोकायाले टिचिङ अस्पताल महाराजगञ्ज काठमाडौंबाट हाडजोर्नी तथा नशा रोगमा एमडी गरेका थिए । कर्णाली स्वास्थ्य विज्ञान प्रतिष्ठानको हाडजोर्नी तथा नशा रोग विभागमा विभागीय प्रमुख समेत रहेका डा. रोकाया प्रतिष्ठानको ईन्सटिच्युशनल रिभ्यु कमिटीमा लामो समय सदस्य सचिवको जिम्मेवारीमा थिए ।
