राप्ती राजमार्गमा पहिरोले सडक अवरुद्ध हुँदा यात्रुहरू रातभर अलपत्र परेका थिए, बिहान सडक खुलाइयो।
सल्यान — अविरल वर्षासँगै आएको पहिरोले अवरुद्ध भएको राप्ती राजमार्ग १५ घण्टापछि खुलेको छ । सोमबार बिहान चोरखोला आसपासमा खसेको पहिरो सम्बन्धित निकायको डोजरले हटाएपछि राजमार्ग सुचारु भएको हो ।
कपुरकोट गाउँपालिका–३ चोरखोला आसपासमा दुई–तीन स्थानमा पहिरो खसेका कारण राप्ती राजमार्ग आइतबार बेलुकी ६ बजेदेखि अवरुद्ध थियो । राति डोजर सञ्चालन जोखिमपूर्ण भएकाले तत्काल सडक खोल्न नसकिएको र यात्रु तथा सवारीसाधन सडकमै अलपत्र परेका थिए ।
अवरुद्ध सडक खुलेपछि बिहानैदेखि रोकिएका गाडीहरू गन्तव्यतर्फ निस्किएका जिल्ला प्रहरी कार्यालय सल्यानका प्रहरी निरीक्षक रेशम खत्रीले जानकारी दिए । उनका अनुसार चोरखोलामा खसेको पहिरो डोजरले बिहानैदेखि चार घण्टा बढी मेहनत गरेर हटाइएको हो ।
‘रातिको समयमा ढुंगामाटो खसिरहेकाले जोखिमपूर्ण थियो, त्यसैले डोजरले बिहान मात्र काम गर्न थाल्यो,’ निरीक्षक खत्रीले भने ।
राप्ती राजमार्गको चोरखोलामा हल्का वर्षा हुँदा पनि पहिरो जानु र माथिबाट ढुंगा खस्ने गरेकाले यात्रुहरूलाई आवतजावतमा सास्ती भएको उनले बताए । सडक बिग्रिएकाले उच्च सतर्कता अपनाउन व्यवसायीलाई आग्रह गर्दै वर्षा हुने समयमा वैकल्पिक मार्ग प्रयोग गर्न जिल्लावासीलाई सुझाव दिए ।
