जुम्ला — कर्णाली राजमार्गको कालिकोट खण्डमा पर्ने गगनेखोलामा लेदोसहितको पहिरो गएपछि सडक अवरुद्ध भएको छ ।

पहिरोले सडक ठप्प भएपछि सयौं सवारीसाधन बाटोमा अलपत्र परेका छन् । जिल्ला प्रशासन कार्यालय कालिकोटका सहायक प्रमुख जिल्ला अधिकारी जनक शर्माले दिउँसो साढे ३ बजेदेखि आएको अविरल वर्षाले गगनेखोलामा लेदोसँगै ढुंगाहरु खसेको बताए । उनले भने, ‘अहिले पनि मुसलधारे वर्षा भइरहेको छ । लेदोसहितको ढुंगाहरु निरन्तर बगिरहेका छन् । तत्काल सडक खुलाउन नसकिने अवस्था छ ।’ 

पहिरो नरोकिएपछि सवारी साधन सञ्चालनमा रोक लगाइएको छ । पछिल्ला दिनहरुमा निरन्तर पहिरो जाने भएपछि बेलुकी ८ बजेदेखि सवारीसाधन सञ्चालनमा रोक लगाइएको सूचना अधिकारी समेत रहेका सहायक प्रमुख जिल्ला अधिकारी शर्माले भने, ‘अहिले त झन लेदोसहितको पहिरो झरिरहेको छ ।’

उनले वर्षा रोकिएपछि मंगलबार बिहानदेखि मात्रै सडक खुलाउन सुरु गर्ने तयारी भइरहेको बताए । सडक डिभिजन कार्यालय जुम्लाले वर्षा भइरहेकोले सडक खुलाउन केही समय लाग्ने जनाएको छ । यो कठिन अवस्थामा यात्रा नगर्न समेत यात्रुलाई सुझाव दिइएको छ । सामाजिक सञ्जाल फेसबुकमा सडक डिभिजन कार्यालयले सडकको अवस्था बुझेर मात्र यात्रा तय गर्न आग्रह गरेको छ ।