जुम्ला — गुठिचौर गाउँपालिका–५ स्थित ठूलो हाँका पाटनमा चराइरहेको अवस्थामा दिउँसो ४ बजे भेडाको बथानमाथि चट्याङ पर्दा एक जना बेहोस भएका छन् भने तीन सयभन्दा धेरै भेडा हताहती भएको जिल्ला प्रहरी कार्यालय जुम्लाले जनाएको छ ।
सिञ्जा गाउँपालिका–६ भाडगाउँका ५२ वर्षीय धनबहादुर रावत बेहोस अवस्थामा रहेको खबर प्राप्त भएको डिएसपी रबिनबाबु रेग्मीले जानकारी दिए । उनले भने, ‘गोठालाका रूपमा रहेका गोविन्द बुढाले फोन गरेर चट्याङ परेर ठूलो क्षति भएको खबर गरे । अहिले सशस्त्र प्रहरी, नेपाली प्रहरी र भेडापालक किसानका आफन्तहरूको टोली घटनास्थलमा जाने तयारी भइरहेको छ ।’
जुम्लाका प्रमुख जिल्ला अधिकारी केदारनाथ शर्माले चट्याङबाट सिकिस्त घाइते भएका रावतलाई उद्धार गर्न गृह मन्त्रालयमा हेलिकप्टरको व्यवस्था गर्न पहल भइरहेको बताए । चट्याङ परेको स्थान निकै टाढा भएको र मौसम प्रतिकूल हुनुका साथै राति परिसकेकोले हेलिकोप्टर आउने सम्भावना कम भएको जिल्ला प्रशासन कार्यालय जुम्लाले जनाएको छ । सो पाटनमा ६ जना किसानका ९ सयभन्दा धेरै भेडा पालन भइरहेको थियो ।
तर तीन जना किसानका भेडा एक घण्टाको टाढा दुरीमा रहेको बताइएको छ । पाटनमा गोठाला भएका गोविन्द बुढाका अनुसार बेहोस अवस्थामा रहेका रावतको अवस्था गम्भीर छ । उक्त स्थान प्रहरी चौकीबाट झारज्वालबाट ७ घण्टा दक्षिण र जिल्ला प्रहरी कार्यालय जुम्लाबाट १० घण्टा पूर्व दक्षिण क्षेत्रमा पर्छ । डिएसपी रेग्मीले भने, ‘अहिले हेलिकोप्टरको सम्भावना कम भइसक्यो । सुरक्षाकर्मीको टोली परिचालनको तयारी भइरहेको छ ।’
'हेलिकोप्टर उडाउन सम्पर्क गरेको उडाउन सकिँदैन भन्यो । हुम्लादेखि आउने भएकोले फ्युल पनि नभएको देखियो,' प्रमुख जिल्ला अधिकारी शर्माले भने, ‘स्थलगत टोली खटिन थालेको छ । ’
टोली गुठिचौरसम्म गाडीमा जानेछ । त्यहाँदेखि पैदल जानेछ । प्रहरी टोली घटनास्थलमा पुगेपछि मात्र पूरा विवरण आउने छ । सिञ्जा गाउँपालिकाले चट्याङबाट घाइते भएका रावतको तत्काल उद्धार गर्न माग गरेको छ ।
