सल्यान — सल्यानमा आइतबार दिउँसो जिप दुर्घटना हुँदा ९ जना घाइते भएका छन् । कपुरकोट गाउँपालिका ५ रिमदेखि तुलसिपुर जाँदै गरेको लु १ ज १६३७ नम्बरको जिप कपुरकोट गाउँपालिका-३ लामीडाँडा स्थित राप्ती राजमार्गमा दुर्घटना भएको हो ।
जिल्ला प्रहरी कार्यालय सल्यानका सूचना अधिकारी प्रहरी निरीक्षक बाबुराम बस्नेतले घाइते सबैलाई उपचारका लागि प्रादेशिक अस्पताल तुलसीपुर पठाइएको र त्यहाँबाट गम्भीर र मध्यम घाइते ६ जनालाई नेपालगन्ज रिफर गरिएको बताए ।
जिप अनियन्त्रित भएर दुर्घटनामा परेको प्रहरी निरीक्षक बस्नेतले जानकारी गराए । कपुरकोट गाउँपालिका-५ रिम बस्ने जिपचालक ३७ वर्षीय ज्ञानबहादुर महतारालाई प्रहरीले नियन्त्रणमा लिएको छ । जिपमा १२ जना यात्रु सवार थिए ।
