डोल्पा — डोल्पाको ठाँगे लेकमा यार्सा संकलन गर्न गएका दुई गाउँका स्थानीयबीच झडप भएको छ । शनिबार दिउँसो सिमाना विवाद उत्पन्न भएपछि काइके गाउँपालिका-२ र ठुलिभेरी नगरपालिका-१ थालाका स्थानीयबीच झडप भएको हो ।
दुई गाउँका स्थानीयले भीरबाट ढुंगा खसालाखसाल गरेर झगडा गरेको प्रमुख जिल्ला अधिकारी रोमबहादुर महतले जानकारी दिए । झडप नियन्त्रणमा लिन सशस्त्र प्रहरीले दुई राउण्ड हवाई फायरसमेत गरेको जिल्ला प्रहरी कार्यालय डोल्पाका प्रहरी निरीक्षक मनिष थापाले जानकारी दिए । उनका अनुसार कसले कहाँसम्म यार्सा संकलन गर्न पाउने भन्ने विषयमा दुई गाउँले बीच विवाद भएको हो ।
