सुर्खेत — हुम्ला र बाजुराका दुईजना गर्भवतीलाई नेपाली सेनाको हेलिकोप्टरमार्फत उद्धार गरिएको छ । मंगलबार हुम्लाको चंखेली गाउँपालिका-६ की १८ वर्षीया धनशिला बुढा र हिमाली गाउँपालिका बाजुराकी १७ वर्षीया जुनिता थापालाई हेलिकोप्टरमार्फत सुर्खेत ल्याइएको हो ।

उद्धार गरिएका दुवै महिलालाई कर्णाली प्रदेश अस्पतालमा लगिएको छ । हुम्ला जिल्ला अस्पतालका सिनियर अनमी सरिता बोहोराले आमा र शिशु दुवैमा जटिल समस्या देखापरेपछि प्रदेश अस्पताल रिफर गरेको बताइन् । आमाको ब्रेनमा इन्फेक्सन र गर्भमा रहेको शिुशुको मुटुको धड्कन कम चलेको छ ।

‘चंखेलीबाट तीन दिन लगाएर जिल्ला अस्पताल पुग्नुभएको थियो,' उनले भनिन्, ‘पेटमा बच्चा बसेको ८ महिना मात्र भएको छ तर, आमामा समस्या धेरै छन् । प्रदेश अस्पतालमा उपकरण र सुविधासम्पन्न भएकाले आमा र शिशुको ज्यान जोगाउन सकिन्छ भनेर पठाएका हौं ।’