जुम्ला — जुम्लाको तातोपानी गाउँपालिकाले रासायनिक विषादी प्रयोगमा प्रतिबन्ध लगाएको छ । तरकारी तथा अन्नबालीमा रासायनिक विषादीको अत्यधिक प्रयोगले मानव स्वास्थ्यमा असर पारेको भन्दै विषादी प्रयोगमा प्रतिबन्ध नै लगाइएको हो । 

सोमबार बसेको गाउँ कार्यपालिकाको बैठकले रासायनिक विषादी प्रयोग गर्ने किसानलाई उपलब्ध गराइने सेवा सुविधासमेत कटौती गर्ने निर्णय गरेको छ । बैठकले रासायनिक विषादी प्रयोग गर्ने किसानको जानकारी गोप्य रुपमा दिने व्यक्तिलाई पुरस्कार दिने निर्णय गरेको प्रमुख प्रशासकीय अधिकृत तिर्थबहादुर कठायतले जानकारी दिए । 

उनले भने, ‘विषादी मिसिएको खान्कीले दिनप्रतिदिन मानव स्वास्थ्यमा असर पारिरहेको छ । यही अवस्थामा नरोके ठूलो समस्या आउने देखिएको छ ।’ किसानले धानमा आउने झार मार्न ब्यापक रुपमा ब्युटाकोलर नामक विषादीको प्रयोग गरिराखेका छन् ।