जुम्ला — गाउँ आसपासमा लेदोसहितको पहिरो जान थालेपछि पाँच दिनदेखि हुम्ला नाम्खा गाउँपालिका–६ तिलगाउँका स्थानीय विस्थापित बनेका छन् । केही विद्यालयमा आश्रय लिएर बसिरहेका छन् भने केही चौरमा त्रिपाल टाँगेर बसिरहेका छन् । अहिले पनि लेदो झरिरहेकोले उनीहरू गाउँ फर्कन सकेका छैनन् ।

स्थानीयले तत्काल लेदोसहितको पहिरो कताबाट कसरी आएको हो, फेरि आउँछ–आउँदैन भनेर ढुक्क हुन नसकेपछि गाउँ नफर्किने अडान राखेका छन् । 

हुम्लाका प्रमुख जिल्ला अधिकारी नारायण पाण्डेयले पहिरोको विस्तृत अध्ययन नहुँदासम्म नागरिकलाई गाउँ फर्काउन नसकिने बताए । उनले भने, ‘प्रारम्भिक अध्ययन अनुसार हिमताल पुगेर लेदोसहितको पहिरो खसेको भन्ने जानकारीमा आएको छ तर खानी तथा भूगर्भविद्‌को टोली आएर अध्ययन नगर्दासम्म भन्न सकिने अवस्था छैन ।’

बाढी गएको बारेमा गृह मन्त्रालय, विपद् व्यवस्थापन शाखा, खानी तथा भूगर्भ विभागसँग निरन्तर समन्वय भइरहेको बताए । ‘खानी तथा भूगर्भविद्‌ले ईसिमोडलाई अध्ययन गर्न भनिसकेको सुन्नमा आएको छ तर आधिकारिक खबर आइपुगेको छैन,’ उनले भने ।

गाउँ नै जोखिममा परेपछि ३२ जनालाई खुला चौरमा त्रिपालमा राखिएको छ । २१ जना महिला ९ जना पुरुष र २ जना बालक छन् । गाउँमा ५० घर रहेकोमा १८ घरपरिवार मात्रै बसोबास गरिरहेका छन् ।

पहिरोले मानवीय क्षति त भएन तर गाउँमा जोखिम देखिएकोले समस्या भएको  छ । सदरमुकाम सिमिकोट देखि ११ घन्टाको पैदल दुरीमा पर्छ । सहजैरूपमा आउजाउ गर्न कठिन छ ।

'के कारणले पहिरो आयो ? फेरि पनि पहिरो आएर गाउँ नै बगाउने हो कि भन्ने त्रास कायमै छ,' प्रमुख जिल्ला अधिकारी पाण्डेयले भने, ‘केन्द्रबाट विज्ञ टोली आएर अब केही हुँदैन । सुरक्षितसँग बस्न सक्नु हुन्छ भन्ने स्थिति नआउँदासम्म घर फर्काउन सकिने अवस्था छैन ।'