वीरेन्द्रनगर — प्रमुख प्रतिपक्ष र प्रतिपक्षी दलका प्रदेश सभा सदस्यहरू अनुपस्थित भएपछि कर्णाली प्रदेश सभा बैठक स्थगित भएको छ । सोमबारको बैठक कार्यसूचीमै प्रवेश नगरी जेठ १८ गतेसम्मका लागि स्थगित भएको हो ।
आइतबार कार्य व्यवस्था परामर्श समितिको बैठक बसेर सोमबार बस्ने प्रदेश सभा बैठकमा जरुरी सार्वजनिक महत्त्वको प्रस्ताव र महालेखा परीक्षकको सातौं वार्षिक प्रतिवेदन २०८२ पेस गर्ने कार्यसूची तयार गरेको थियो । तर बैठकमा प्रतिपक्ष दलका कोही पनि प्रदेश सभा सदस्य उपस्थित नभएपछि बैठक कार्यसूचीमै प्रवेश नगरी स्थगित भएको हो ।
सभामुख नन्दा गुरुङले प्रमुख प्रतिपक्ष दल बैठकमा उपस्थित नहुने भन्ने विषयमा जानकारी नपाएको बताइन् । उनले नेकपा समाजवादीका प्रदेश सभा सदस्य कल्याणी खड्का पार्टीको कार्यक्रमका सिलसिलामा काठमाडौं गएको र राप्रपाका प्रदेश सभा सदस्य सन्तोषी शाही बिरामी भएकाले उपस्थित हुन नसक्ने जानकारीबाहेक अरु थाहा नभएको जानकारी दिइन् ।कार्यव्यवस्था परामर्श समितिको बैठकमा सबै आउनुभएको र पछि नआउने भन्नेबारे जानकारी नभएको उनले बताइन् ।
यता प्रमुख प्रतिपक्ष दल नेकपा माओवादी केन्द्रका प्रमुख सचेतक कृष्णबहादुर जीसीले 'आफूहरू पार्टीको अभियानमा जानुपरेको र बिजनेस नभएकाले बैठक दुई-चार दिन पछि राखौं भन्दा सत्तापक्षले नमानेकाले अनुपस्थित भएको' बताए ।
