वीरेन्द्रनगर — कर्णालीमा पहिलोपटक ‘कर्णाली छोरी सम्मेलन’ सुरु भएको छ । ज्योति फाउन्डेसन र सामाजिक विकास मन्त्रालयको आयोजनामा प्रदेश राजधानी वीरेन्द्रनगरमा शनिबार सुरु सम्मेलनको तारा भट्टराई र उनको समूहले उद्घाटन गरेको थियो ।

कर्णालीका ६९ वटा पालिकाका छोरीहरू भेला भएको सम्मेलनमा उनीहरूले मुख्यमन्त्री यामलाल कँडेल र उनकी श्रीमति गीता अधिकारीलाई कर्णालीका छोरीलाई समान अवसर र शिक्षाको प्रत्याभूत गराउने प्रतिबद्धतापत्र वाचन गर्न लगाएका थिए । 

मुख्यमन्त्री कँडेलले चेतनाको अभावका कारण कर्णालीमा अझै पनि अन्धविश्वास कायमै रहेको बताए । ‘समाजमा अन्धविश्वास छ, कुरीरित छ,’ उनले भने, ‘त्यो अझै बदलिन सकेको छैन, बदल्नैपर्छ । कर्णालीको अवस्था बदल्न सबैको सहभागिता आवश्यक हुन्छ ।’ संवैधानिक हिसाबले विभेदमुक्त भनिए पनि व्यवहारमा अझै विभेदका आयम  कायमै रहेको उनको भनाइ छ । ‘व्यवहारमा कसैले कसैलाई हिनताबोध नहुने गरी समाज निर्माण गर्ने कुरामा सबैले ध्यान दिनुपर्नेछ,’ कँडेलले भने, ‘संविधानमा धेरै कुरा लेखिएको छ, त्यो लेखाउन ७० वर्ष लाग्यो । तर व्यवहारमा अझै लागू हुन सकिरहेको अवस्था छैन ।’ उनले छोरीहरुलाई राजनीतितर्फ अग्रसर हुन पनि आग्रह गरे । ‘राजनीति भनेको स्वाभिमानको यात्रा हो,’ उनले भने, ‘राजनीति थाह पाउनुभयो भने राम्रो हुन्छ ।’