काठमाडौँ — डोल्पाको त्रिपुरासुन्दरी नगरपालिकाको वडा नम्बर १ का तीनसय घरधुरी दुई दिनदेखी बिजुली विहिन भएका छन् । छलगार्ड लघु जलविद्युत आयोजनामा प्रयोग भएको मेसिन बिग्रेपछि यस्तो समस्या निम्तिएको हो ।

विश्व वन्यजन्तु कोषको सहयोगमा १८ बर्ष अघि निर्माण भएको उक्त जलविद्युत अहिले स्थानीय उपभोक्ता समिति मार्फत चलिरहेको छ । नगरपालिकाको केन्द्र भएको त्रिपुराकोट बजारमा बत्ती नहुँदा दैनिक जनजीवन नै प्रभावित बनेको छ । रातीको समयमा स्थानियहरु खाना पकाउने तेलबाट बत्ती बालेर अध्यारो भगाउन बाध्य छन् ।
आयोजनाका कर्मचारी मोती प्रसाद हमालले एक्कासी मेसिनको बेरिङ बिग्रेपछि विद्युत सेवा अवरुद्ध भएको बताए । उनले बिग्रेको उपकरण बुटवलबाट मगाउनुपर्ने तर त्यसका निम्ती समितीसँग पैसा नभएको बताउँदै भने, ‘कहिलेसम्म अन्धकार हुने हो थाहा छैन् ।’