जुम्ला — सदरमुकाम खलंगामा प्रादेशिक कृषि पर्यटन, सांस्कृतिक तथा औद्योगिक महोत्सव सुरु भएको छ । उद्योग वाणिज्य संघ जुम्लाको आयोजनामा १० दिने महोत्सव सुरु भएको हो । महोत्सवमा स्थानीय सामाग्रीको मात्रै प्रदर्शन, प्रवर्द्धन र बजारीकरण हुने आयोजकले जनाएको छ ।

महोत्सवको उद्घाटन कर्णाली प्रदेशसभा सदस्य देवेन्द्रबहादुर शाहीले गरे । यो महोत्सवले कर्णालीको कृषि पर्यटनलाई टेवा पुग्नुका साथै सांस्कृतिक तथा औद्योगिक हिसाबले पनि राम्रो सन्देश फैलाउने उनको जिकिर छ । उनले भने, ‘स्थानीय उत्पादनको प्रचारप्रसार,पर्यटन प्रवर्द्धन र सांस्कृतिक संरक्षणको लागि महत्त्वपूर्ण भूमिका निभाउनेछ ।’ उनका अनुसार महोत्सवमा धेरैभन्दा धेरै अवलोकनकर्ताहरु सहभागी गराउने तयारी भइरहेको छ । 

महोत्सवमा कर्णालीका कलाकारहरुको मात्रै सहभागिता हुनेछ । जसले स्थानीय संस्कृतिको समेत उजागार हुने उद्योग वाणिज्य संघका अध्यक्ष पुरिचन्द्र देवकोटाले जानकारी दिए । उनका अनुसार महोत्सवमा देउडा गायक नवराज भण्डारी, विपना सिंह,सम्झना अधिकारीको प्रस्तुति रहनेछ । योसँगै जुम्ला घर भइ काठमाडौंमा कर्मथलो बनाएका कलाकारहरु पनि आउने छन् । जिल्लाभित्र रहेका प्रतिभाहरुको समेत प्रतिनिधित्व हुने उद्योग वाणिज्य संघ जुम्लाका अध्यक्ष देवकोटाले बताए । 'यो महोत्सवमा स्थानीय स्वाद चखाउने जमर्को गरिएको छ,' उनले भने, ‘जसले गर्दा रैथाने संस्कृति र संस्कारको परिचय दिनेछ ।’