वास सम्मेलनले तीनवटै स्थानीयतहको खानेपानी तथा सरसफाइको अवस्था दर्शाएको हिमा गाउँपालिका अध्यक्ष लक्ष्मणबहादुर शाहीले बताए । उनका अनुसार सम्मेलनले स्थानीय तहमा भइरहेका खानेपानी तथा सरसफाइका क्रियाकलापको उजागार गर्नुको साथै समस्या र चुनौती पनि पहिचान गरेको छ ।

घोषणापत्रमा सबै पालिकामा खानेपानी योजनालाई सहायता केन्द्रका रुपमा स्थापित गर्ने र मर्मतसम्भार कोषको व्यवस्था गर्ने उल्लेख छ । एक घर एक धारा, एक घर एक सुधारिएको शौचालय निर्माण अभियानलाई तीव्र पार्ने, हरेक घरमा साबुनपानीले हात धुने बानीको विकास गराउने, पूर्ण सरसफाइ उन्मुख पालिका निर्माणका लागि वास समन्वय समिति, कार्यदल, आमा समूह र सरोकारवालाबीचको सम्बन्ध बलियो बनाउने समेत घोषणा पत्रमा उल्लेख छ ।

सार्वजनिक स्थल र संस्थाहरुमा लैंगिकमैत्री सुरक्षित खानेपानी तथा सरसफाइ सुविधा दिने, सामाजिक रुपमा देखिएका हानिकारक कुप्रथाको अन्त्य गर्न अभियान चलाउने,पानीको बहुपयोग प्रणालीलाई प्राथमिकतामा राखी योजना निर्माण गर्ने, करेसाबारी व्यवस्थापन तथा तरल फोहोरको व्यवस्थापन गरी सार्वजनिक स्थलमा वृक्षरोपणको काम गर्ने घोषणापत्रमा उल्लेख छ । पालिकाको विकास बजेटको कम्तीमा १० प्रतिशत वार्षिक रुपमा खानेपानी तथा सरसफाइका क्षेत्रमा लगाउने, गाउँपालिकाको खानेपानी, सरसफाइ तथा स्वच्छता ऐनको भावनालाई आत्मसाथ गर्दै सरसफाइ तथा स्वच्छता इकाइलाई स्थायी शाखाको रुपमा स्थापना गर्ने समेत उल्लेख छ ।