रुकुम पश्चिम — स्वास्थ्य सेवा कार्यालय रुकुम पश्चिममा कार्यरत स्वास्थ्यकर्मीले ६ महिनादेखि तलब–भत्ता नपाएको बताएका छन् । मेडिकल अधिकृत, डेन्टल अधिकृत र जनस्वास्थ्य अधिकृत गरी १२ जनाले कात्तिकदेखि चैतसम्मको पारिश्रमिक नपाएको भन्दै वैशाख ३ गतेसम्मको अल्टिमेटमसहित स्वास्थ्य सेवा कार्यालयमार्फत ध्यानाकर्षण गराएका छन् । 

आइतबार कार्यालय प्रमुखलाई सम्बोधन गरेर सामूहिक हस्ताक्षरसहित बुझाइएको पत्रमा वैशाख ३ सम्म तलब–भत्ता उपलब्ध नभएमा अस्पतालको आपत्‌कालीन बाहेकको सेवा बन्द गर्ने चेतावनीसमेत दिएका दिइएको छ ।

छात्रवृत्ति करारमा कार्यरतमध्येका एक डा. पराग जिसी सुवेदीले यसरी तलब–भत्ता नपाउनेमा मेडिकल अधिकृत ७, डेन्टल सर्जन २ र जनस्वास्थ्य अधिकृत ३ जना रहेको बताए । यसअघि यही कार्यालयमा काम गरेर बिदाइ भएका ३ मेडिकल अधिकृत र १ डेन्टल सर्जन गरी ४ जनाले पनि अहिलेसम्म तलब–भत्ता नपाएको उनको भनाइ छ ।

‘हामी निरन्तर काममा छौं । तर पाउनुपर्ने पारिश्रमिक नै नपाउँदा निकै कठिन भइरहेको छ । केही समय त जसोतसो दैनिकी चलायौं । अब भने गाह्रो हुन थाल्यो,’ सुवेदीले भने, ‘अति भएपछि कार्यालयमार्फत सम्बन्धित निकायमा दबाब दिन ३ गतेसम्मको अल्टिमेटमसहितको पत्र बुझाउन बाध्य भएका हौं ।’

स्वास्थ्य सेवा कार्यालय प्रमुख महेश चौलागाईंले नेपाल सरकार स्वास्थ्य विभागबाट कर्णाली प्रदेशको सामाजिक विकास मन्त्रालयमार्फत जिल्लामा बजेट आउने गरेकामा कात्तिकदेखि उक्त बजेट नआएको बताए ।