सल्यान — बुधबार राति आगलागीबाट सल्यानमा दुईवटा घरगोठ जलेर नष्ठट भएका छन् ।
जिल्लाको कालिमाटी गाउँपालिका–२ खैरीगाँडाका ४० वर्षीय केशलाल ओली र ५२ वर्षीय प्रेम विकको घरगोठ आगलागीबाट जलेर नष्ट भएको हो ।
आगालगीका कारण घरमा रहेका अन्नपात, लत्ताकपडा, भाँडा जलेका छन् । केशलाल ओलीको गोठमा रहेका एक गोरु, ११ खसीबाख्रा, दुई दर्जन बढी खुकुरा जलेर बरेका छन् ।
आगलागीपछि परिवारले भने भागेर ज्यान जोगाएका छन् । आगलागीबाट केशलालको तीन लाख र प्रमेको साढे तीन लाख गरी अनुमानित ६ लाख ५० हजार रुपैयाँ बराबरको क्षति भएको जिल्लला प्रहरी कार्यालय सल्यानका प्रहरी निरीक्षक रेशमबहादुर खत्रीले जानकारी दिए ।
यस्तै प्रेम विकको घरभित्र रहेको १७ हजार रुपैयाँ नगद, दुई हाँस, ६ वटा कुखुरा, अन्नपात, लत्ताकपडा, भाँडाकुडा जलेर नष्ट भएको प्रहरी निरीक्षक खत्रीले बताए ।
गोठमा लागेको आगो घरसम्म पुगेको थियो । आगलागीको कारण भने खुल्न सकेको छैन ।
स्थानीय मोतिलाल ओलीले रातिको समयमा आगलागी भएपछि सबै गाउँले मिलेर आगो नियन्त्रणमा लिने प्रयास गरे पनि असफल भएको बताए ।
पीडित परिवारलाई अहिले आफन्तकहाँ राखिएको उनले जानकारी गराए । सुरुमा फुसको दुई तले गोठमा लागेको आगोकै कारण नजिकको अर्को घर पनि जलेको उनको भनाइ छ ।
