सुर्खेत — मध्यपश्चिम विश्वविद्यालयले शैक्षिक कार्यक्रम सुरु गरेको १२ वर्षमा शुक्रबार तेस्रो दीक्षान्त समारोह गर्दैछ । प्रधानमन्त्री एवं विश्वविद्यालयका कुलपति केपी शर्मा ओलीको उपस्थितिमा दोस्रो दीक्षान्त भएको झन्डै ३ वर्षपछि तेस्रो दीक्षान्त समारोह हुन लागेको हो । जसमा २०७९ सालदेखिका ३ हजार ८ सय ४१ विद्यार्थी दीक्षित हुँदैछन् ।

विश्वविद्यालयअन्तर्गत ७ वटा केन्द्रीय विभाग, १० वटा आङ्गिक कार्यक्रम र १ वटा विशेष कार्यक्रम सञ्चालनमा छन् । विश्वविद्यालयअन्तर्गत झन्डै १२ हजार विद्यार्थी अध्ययनरत छन् । विश्वविद्यालयले ९ वटा विषयमा स्नातक र १३ वटा विषयमा स्नातकोत्तर अध्यापन गराउँदै आएको छ ।

तर विश्वविद्यालयले कार्यक्रमको व्यवस्थापन नगर्दा लामो अवधिमा दीक्षान्त समारोह हुने गरेको हो । दीक्षान्त समारोह विद्यालयको नियमित कार्यक्रम भएकाले हरेक वर्ष गर्दा त्यसले विश्वविद्यालयको गरिमा बढाउने विश्वविद्यालयका पूर्व डीन पीताम्बर ढकालले बताए । ‘विश्वविद्यालयको प्रशासन र रेपुटेसन पनि दिक्षान्तसँग जोडिएको हुन्छ,’ उनले भने, ‘हरेक वर्ष उत्कृष्ट विद्यार्थीलाई पुरस्कृत गर्ने र सक्कली प्रमाणपत्र दिनुपर्ने हो, तर ४/५ वर्षपछि प्रमाणपत्र दिनु जायज होइन ।’

दीक्षान्त समारोह विद्यार्थीका लागि उत्सव र उत्साह भएको विश्वविद्यालयबाट २०७९ सालमा स्नातकोत्तर उत्तीर्ण गरेका सुर्खेतको वीरेन्द्रनगर-१३ का गोविन्द पौडेलले बताए । उनले समयमै दीक्षान्त हुँदा राम्रो सन्देश जाने बताए ।

दीक्षान्त समारोहको प्रमाणपत्र समयमा नपाउँदा विद्यार्थीको वृत्ति विकासमा पनि समस्या भइरहेको शिक्षाविद् मीनबहादुर पुन बताउँछन् । ‘उत्तीर्ण भएकै वर्ष दीक्षान्त हुँदा विद्यार्थीमा ठूलो उत्साह हुन्छ, शैक्षिक उपाधि हासिल गर्नु व्यक्तिको सफलतासँग जोडिएकाले ताजा हुँदा गाउन र टोपी लगाउन पनि विद्यार्थी उत्साही हुन्छन्,’ उनले भने, ‘पुरानो हुँदा उत्साह पनि घटिसकेको हुन्छ, यो त विद्यार्थीको मनोविज्ञानसँग पनि जोडिएको विषय हो ।’ 

यही कुरालाई पुष्टि गर्छ, तेस्रो दीक्षान्त समारोहका लागि फाराम भरेका विद्यार्थीको संख्याले पनि । यो वर्ष ३ हजार ८ सय ४१ जना सहभागी हुने विश्वविद्यालयले जनाएको छ । तर ८ सय ८५ जनाले मात्र फाराम भरेका छन् । विदेश गएका, देशभित्रै विभिन्न ठाउँमा जागिर गरिरहेका र कतिपयले सूचना नपाएर पनि फाराम नभरेको हुनसक्ने विश्वविद्यालयका रजिस्ट्रार प्रा.डा. शोभा खर कँडेलले बताए ।