जुम्ला — जुम्ला सदरमुकाम खलंगाको बिचमा बग्ने जुगाडखोलालाई स्वच्छ, सफा र कन्चन बनाउन जुगाडखोला करिडोर निर्माणको काम सुरु भएको छ । करिडोरले पछिल्लो समयमा फोहोर र दूषित बन्दै गइरहेको जुगाडखोला आकर्षक बनाउने नगरपालिकाले जनाएको छ । 

करिडोरको शिलान्यास चन्दननाथ नगरपालिकाका उपप्रमुख रामदेवी खड्काले गरिन् । नगरपालिकाको पर्यटन प्रवर्द्धन गर्न करिडोरले निकै ठूलो भूमिका खेल्ने उपप्रमुख खड्काको विश्वास छ । उनले भनिन्, ‘जुगाडखोला करिडोर आफैंमा पर्यटकीय गन्तव्य बन्ने निश्चित छ । त्यसैमा पनि कन्चन जुगाडखोलाको दृश्यले मनै लोभ्याउनेछ ।’

करिडोरमा पर्यटन पूर्वाधार निर्माणका लागि रेखांकनसमेत सुरु भइसकेको छ । चन्दननाथ-५ स्थित खानेपानी उपभोक्ता समितिको कार्यालय नजिकैबाट डोजर लगाइएको हो । 

करिडोर बहुवर्षीय योजनाअनुसार पहिलोपटक ६ करोड रुपैयाँ छुट्याइएको छ । चालु आर्थिक वर्षमा तीन किलोमिटर करिडोरको काम निर्माण हुने नगरप्रमुख राजुसिंह कठायतले जानकारी दिए । खानेपानी उपभोक्ता समितिको कार्यालयदेखि चन्दननाथ-४ मालाभिडसम्म दायाँबायाँ दुई मिटर फराकिलो करिडोर यो आर्थिक वर्षभित्रै निर्माण हुने छ ।