सुर्खेत — खेलकुद क्षेत्र र खेलाडीको विकास गर्ने हो भने एक पालिका एक खेल मैदान बनाउन आवश्यक रहेको आर्थिक मामिला तथा योजना मन्त्री राजीवविक्रम शाहले बताएका छन् ।

जाजरकोटको छेडागाड नगरपालिकामा सोमबारदेखि सुरु भएको पाँचौं मेयर कप तथा राष्ट्रपति रनिङ सिल्ड खेलकुद प्रतियोगिताको उद्घाटन गर्दै मन्त्री शाहले केन्द्रमा विजय प्राप्त गर्ने खेलाडी मात्र खोजेर नहुने बताए ।

वडा र पालिकास्तरबाट खेलाडी उत्पादन गर्न आवशयक रहेको पनि उनको भनाइ छ । खेल, शिक्षा र स्वास्थ्य क्षेत्रमा पर्याप्त बजेट विनियोजन गर्न पालिकालाई सुझाव दिए । ‘विकास र सेवामा राजनीति घुसाउनु हुँदैन,’ उनले भने  ।

नगर क्षेत्रमा रहेका क्रियाशील खेलाडीहरूको अन्तर्निहित क्षमता र खेल क्षेत्रको विकासका लागि मेयर कप संचालन गरेको नगर प्रमुख रत्नबहादुर खड्काले बताए ।

छेडागाड नगरपालिकाका उपप्रमुख चन्द्रबहादुर थापाले पालिकामै हुने प्रतियोगिताले खेलाडीमा थप हौसला बढाउने बताए । ‘खेलाडी र खेल क्षेत्रको विकासमा पालिकाले आवश्यक बजेटको व्यवस्था गर्नुपर्छ,’ उनले भने, ‘खेलक्षेत्रका आवश्यक संरचना पालिकामै बनाउन सके विभिन्न लतमा लागेका युवाहरू खेलक्षेत्रमा आकर्षित हुन्छन् ।’