सुर्खेत — कर्णाली प्रदेशमा लामो समयदेखि समस्याग्रस्त रहेका आयोजनालाई अघि बढाउन भौतिक पूर्वाधार तथा सहरी विकास मन्त्रालयले निर्माण व्यवसायीहरूलाई चेतावनी दिएको छ । पटक-पटक ठेक्काको म्याद थपे पनि काम नभएको भन्दै मन्त्री शेरबहादुर बुढाले काम नगर्ने निर्माण व्यवसायीहरूलाई मन्त्रालयमै बोलाएर तोकिएको समयमा काम गर्न निर्देशन दिएका हुन् ।

कर्णालीमा ३३ वटा ठूला आयोजना अलपत्र छन् । कतिपय योजना चौथोपटक पटकसम्म म्याद थप गर्दासमेत प्रगति शून्य छ । मन्त्रालयका अनुसार ३० प्रतिशतमात्र भौतिक प्रगति भएको डोल्पाको दुनै सरस्वती मन्दिरदेखि तिब्लागाउँ थरगाउँ काँडातलीसम्मको दोस्रो ठेक्काको काम अलपत्र पारेको छ । श्रेया जुगल जेभीले उक्त ठेक्का लिएको थियो ।

२०७९ असार १६ गते उक्त ठेक्काको सम्झौता भए पनि काम भने सम्पन्न भएको छैन । यस्तै जाजरकोटको छेडा-थलह-सानाखोला-जाँदे-जुम्ला सडक २०७८ माघ २५ गते सम्झौता भएको थियो । अमर सिस्ने जेभीले १० प्रतिशतमात्र काम गरेको छ । नेपाल मेगा सिस्ने जेभीले २०७८ साउन ४ गते पूर्वाधार विकास कार्यालय, जाजरकोटमा छेडागाड नगरपालिकाको साल्मखोलामा पुल निर्माण गर्ने भन्दै ठेक्का लिएको थियो । पुलको हालसम्म ३० प्रतिशतमात्र काम गरेको छ ।