सल्यान — ५० शय्यामा विस्तार गर्ने उद्देश्यले जिल्ला अस्पताल सल्यानमा निर्माणाधीन दुई भवनको काम तीन महिनादेखि अलपत्र छ । ठेकेदारको बैंक ग्यारेन्टी नभएको भन्दै म्याद थप हुन नसक्दा भवन निर्माण अलपत्र परेको हो । 

जिल्ला अस्पताललाई ५० शय्यामा विस्तार गर्न लागि भवन अपुग भएपछि संघीय सरकारको १८ करोड बजेटमा २०७८ वैशाखमा आरोग्य सुवेदी जेभी कम्पनीसँग ठेक्का सम्झौता भएर निर्माण सुरु गरिएको थियो । विभिन्न कारण जनाउँदै निर्माण कम्पनीले सम्झौता गरेको एक वर्षपछि मात्र निर्माण सुरु गरेको थियो । भवन निर्माण अलपत्र परेपछि निर्माण सामग्री अहिले त्यत्तिकै थन्किएका छन् ।

झन्डै ७५ प्रतिशत काम भएको भवन निर्माणको काम वैशाखदेखि रोकिएको स्वास्थ्य सेवा कार्यालय सल्यानका प्रमुख डा. अर्जुन बुढामगरले बताए । उनका अनुसार दुई निर्माण कम्पनीबाट संयुक्त रुपमा सम्झौता गरेको एक वर्षसम्म काम हुन नसकेपछि आरोग्य निर्माण सेवाले एक्लै सुरु गरेको थियो । पछिल्लो समयमा काम राम्रै भएको थियो । योजना सम्पन्न गर्नुपर्ने अवधि तीन वर्षको भए पनि निर्माण कम्पनीले दुई वर्षमा ७५ प्रतिशत काम सकेको थियो । म्याद थपको लागि बैंक ग्यारेन्टी अनिवार्य रुपमा चाहिने भएकाले ठेकेदारले बैंक ग्यारेन्टीका लागि रकम जम्मा गर्नुपर्ने हो । रकम जम्मा गर्न आनाकानी गर्दा समस्या उत्पन्न भएको छ ।