काठमाडौं — प्रोस्टेट क्यान्सर ट्युमरको भित्री भागमा अनुसन्धानकर्ताहरूले माइक्रोप्लास्टिक भेटेका छन् । ट्युमरभित्र माइक्राेप्लास्टिक भेटिएसँगै प्रदूषणबाट जनस्वास्थयमा पर्ने असरलाई थप उजागर गरेको छ । अमेरिकाको न्यूयोर्क विश्वविद्यालय ल्याङ्गोन हेल्थका वैज्ञानिकहरूले गरेको अध्ययनमा प्रोस्टेट क्यान्सर भएको ट्युमरभित्र माइक्रोप्लास्टिक भेटिएको हो । 

अमेरिकी क्यान्सर उपचार तथा क्यान्सर विज्ञान विशेषज्ञहरूको संस्थाले आयोजना गरेको ‘मूत्र तथा प्रजनन् अङ्गसम्बन्धी क्यान्सर’ सम्मेलनमा अनुसन्धानबाट प्राप्त तथ्य प्रस्तुत गरिएको थियो । अनुसन्धानमा औसत ६५ वर्ष उमेरका प्रोस्टेट क्यान्सरपीडित १० जना पुरुषको नमूनाको विश्लेषण गरिएको थियो । 

उपचारका क्रममा शल्यक्रियाबाट निकालिएपछि क्यान्सर भएको ट्युमरकाे भाग र अर्को क्यान्सर नभएको भागबाट नमूना लिइएको थियो । क्यान्सर भएको ट्युमरमा क्यान्सर नभएको ट्युमरभन्दा औसत रूपमा करिब साढे दुई गुणा बढी प्लास्टिक फेला परेकाे जनाइएको छ । ट्युमरमा प्रतिग्राम करिब ४० माइक्रोग्राम माइक्रोप्लास्टिक भेटिएको अनुसन्धानकर्ताहरूले बताएका छन् । 

अध्ययनकी प्रमुख अनुसन्धानकर्ता तथा न्यूयोर्क विश्वविद्यालय ल्याङ्गोन स्वास्थ्य केन्द्रमा कार्यरत मूत्ररोग विशेषज्ञ डा. स्टेसी लोएबले ट्युमरमा यति धेरै माइक्रोप्लास्टिक भेटिनु ‘अत्यन्तै आश्चर्यजनक र चिन्ताजनक' भएको बताइन्  । उनले भनेकी छन्, ‘यसले प्रोस्टेट क्यान्सर विकाससँग माइक्रोप्लास्टिकको सम्भावित सम्बन्धबारे गम्भीर प्रश्न उठाएको छ, यस विषयमा थप बिरामी समेटेर अध्ययन जारी राखिनेछ । ’

यसअघि सन् २०२४ मा ‘द ल्यान्सेट पत्रिका’मा प्रकाशित चीनका अनुसन्धानकर्ताहरूको अध्ययनले पनि प्रोस्टेट ट्युमरमा प्लास्टिक भेटिएको जनाएका थिए । 

एम डी एन्डरसन क्यान्सर केन्द्रका जिनोमिक चिकित्साशास्त्र विभागका सहप्राध्यापक डा. आन्द्रेआ भियालेले ट्युमरमै माइक्रोप्लास्टिक भेटिनु सार्वजनिक स्वास्थ्यका दृष्टिले गम्भीर विषय भएको बताएका छन् । उनले भनेका छन्  ‘यसले के असर गरिरहेको छ भन्ने पूर्ण रूपमा नबुझे पनि शरीरभित्र यस्तो पदार्थ हुनु आफैमा चिन्ताको विषय हो ।’