काठमाडौँ — हाइपरटेन्शन र मधुमेहजस्ता नसर्ने रोगहरुले आँखाको समस्या बढाइरहेको काठमाडौंस्थित तिलगंगा आँखा प्रतिष्ठानको नयाँ अध्ययनले देखाएको छ ।

गत साता प्रकाशित प्रतिवेदनले अध्ययनमा सहभागी ९७.७ प्रतिशतलाई आँखाको कुनै न कुनै समस्या देखिएको औल्याएको छ । 

४० वर्षमाथिका ४ हजार ९ सय ९० मानिसहरुमा यो अध्ययन गरिएको थियो । छनोट भएकाहरुलाई तिलगंगा अस्पतालमा आँखाको पूर्ण जाँच तथा समग्र स्वास्थ्य परीक्षणका लागि बोलाइएको थियो । 

सहभागीमध्ये ६९.४ प्रतिशत हाइपरटेन्सन र ४७.२ प्रतिशत मधुमेहबाट पीडित रहेको पनि प्रतिवेदनमा उल्लेख छ । ‘हाइपरटेन्शन भएका सहभागीमध्ये एक प्रतिशतलाई हाइपरटेन्सिभ रेटिनोप्याथी भएको थियो । त्यस्तै,मधुमेह भएका मध्ये ७.३ प्रतिशतलाई डाइबेटिक रेटिनोप्याथी, ’ प्रतिवेदनमा उल्लेख छ । 

चिकित्सकहरुका अनुसार दीर्घकालीन उच्च रक्तचापले रेटिनाहरु बिग्रिएर हाइपर्टेन्टिभ रेटिनोप्याथी हुन्छ । त्यस्तै, उच्च ब्लड सुगरका कारण रेटिना खराब भएर डाइबेटिक रेटिनोप्याथी हुन्छ ।

काठमाडौं उपत्यकामा टाइपरटेन्शन र मधुमेहसँगै अत्यधिक तौल र मोटोपन गम्भीर स्वास्थ्य समस्याका रुपमा रहेको पनि चिकित्सकहरुले बताए । चिकित्सकहरुका अनुसार आँखाको समस्या बढाउने असंक्रामक रोगमध्ये यी पनि पर्छन् । 

अध्ययनमा सहभागीमध्ये ४३.५३ प्रतिशत व्यक्ति बढी तौलको र २३ प्रतिशत व्यक्ति मोटोपनबाट गुज्रिएको पनि प्रतिवेदनमा उल्लेख छ ।

‘काठमाडौंमा ४० वर्षमाथिका मानिसमा धेरै मानिसहरुमा हाइपरटेन्सन र मधुमेहजस्ता नसर्ने रोगको जोखिम भयावह देखिएको छ,’ तिलगंगा आँखा प्रतिष्ठानकी प्रमुख कार्यकारी अधिकृत डा. रीता गुरुङले भनिन्, ‘उच्च रक्तचाप र उच्च ब्लड सुगरले आँखासहित समग्र स्वास्थ्यलाई असर गर्छ । ’

नेपालमा पछिल्ला वर्षहरुमा नसर्ने रोगले धेरैको ज्यान लिइरहेको छ  सन् २०१७ को एक प्रतिवेदनअनुसार नेपालमा कुल मृत्युमध्ये नसर्ने रोगबाट ज्यान गुमाउनेको संख्या ६६ प्रतिशत थियो ।