सल्यान — सल्यानको दार्मा गाउँपालिकाका ५१ जनामा स्क्रब टाईफसको संक्रमण पुष्टि भएको छ। गाउँपालिकाका दुई वटा वडाका १२८ जनाको स्वास्थ्य परीक्षण गर्दा ५१ जनामा स्क्रब टाईफसको संक्रमण पुष्टि भएको हो।

गत दुई साताको अवधिमा उच्च ज्वरोका कारण चार महिलाको मृत्यु र गाउँमा बिरामीको संख्या बढ्दै गएपछि गाउँपालिकाले स्वास्थ्य परीक्षण शिविर आयोजना गरेको थियो। गाउँपालिकाले मंगलबार अन्य वडाहरूमा पनि स्वास्थ्य परीक्षण शिविर गर्ने भएको छ।

गाउँपालिकाले त्रसित नहुन र लक्षण देखिएका बिरामीहरूलाई शिविरमा आएर स्वास्थ्य परीक्षण गराउन आग्रह गरेको छ। ज्वरोका बिरामी बढेपछि स्वास्थ्य सेवा कार्यालय सल्यान, दार्मा गाउँपालिका र जेन-जी समूहले आइतबार र सोमबार मात्र संयुक्त रुपमा वडा नं ३ र ५ मा शिविर संचालन गरेका हुन्।

वडा नं ३ मा ६७ जनालाई स्वास्थ्य परीक्षण गर्दा २३ र ५ मा ६१ जनाको परीक्षण गर्दा २८ लाई स्क्रब टाईफसको संक्रमण पुष्टि भएको हो। संक्रमण पुष्टि भएकामध्ये एक जनालाई थप उपचारका लागि जिल्ला अस्पताल रेफर गरिएको छ।

गाउँपालिका अध्यक्ष नीमबहादुर केसीले धेरै जनामा स्क्रब टाईफसको संक्रमण भएको पुष्टि भएपछि शंकास्पद सबै बिरामीहरूको स्वास्थ्य परीक्षण गर्ने तयारी भएको बताए। उनका अनुसार मंगलबारदेखि दार्माकोट, ढाकाडाम र भल्चौर स्वास्थ्यचौकीबाट नियमित रुपमा स्वास्थ्य परीक्षण गरिने छ।

दुई वडामा परीक्षण सम्पन्न भइसकेकाले थप चार वडाका स्थानीयका लागि तीन स्वास्थ्य चौकीमा स्वास्थ्य परीक्षणको व्यवस्था मिलाइएको स्वास्थ्य शाखा प्रमुख यज्ञबहादुर बस्नेतले बताए । पालिकाभरि ६ सय भन्दा बढी बिरामी रहेका उनले बताए।