काठमाडौँ — विश्वभरका चिकित्सकहरुको योग्यता, सिप तथा ज्ञानको परीक्षण गर्ने ‘एमआरसीपी युके पेसेस परीक्षा’ चौंथो पटक नेपाल मेडिसिटीमा सम्पन्न भएको छ ।

असोज २८ गतेदेखि सुरु भएर ३० गतेसम्म ३ दिन सञ्चालन भएको यो परीक्षामा यो वर्ष बंगलादेश, भारत, नेपाल, बेलायत, म्यानमार, ब्रुनाई र माल्दिभ्स देशका ४६ परीक्षार्थीहरू सहभागी रहेको डाक्टर नीरज जोशीले बताए । उनी यो परीक्षामा नेपालकोतर्फबाट प्रमुख परीक्षक हुन् । 

बिहीबार मेडिसिटीमा आयोजित पत्रकार सम्मेलनमा डाक्टर जोशीले दक्षिण एसियाको परीक्षा केन्द्रमध्ये नेपाल पनि पर्ने तर नेपालको लागि भने नेपाल मेडिसिटी पहिलो र एकमात्र केन्द्र रहेको जनाए । 

‘एमआरसीपी भनेको नेपाल र इन्डियाको एमडी इक्विभ्यालेन्ट डिग्री हो । त्यो भनेको इन्टरनल मेडिसिनमा राम्रो तालिम लिएको छ भन्ने डिग्री हो । यो चिकित्सकहरूको लागि विश्वव्यापी रूपमा मान्यता प्राप्त योग्यता हो,’ डाक्टर जोशीले भने, 'यो योग्यता प्राप्त गर्नाले प्रशिक्षार्थी चिकित्सकले आफ्ना बिरामीहरूलाई उत्कृष्ट योग्य चिकित्सकको रूपमा सेवा गर्न उपयुक्त ज्ञान, सीप र मनोवृत्ति हासिल गरेको प्रमाणित गर्छ । यसले साइन्स मात्रै होइन आर्टलाई पनि हेर्छ । बिरामी ठीक पार्न सक्नु मात्रै होइन, उनीहरूलाई बुझाउन सक्नु पर्‍यो, समानूभूत र सहानुभूति हुनुपर्‍यो । त्यसैले यो परीक्षाले आर्ट पनि परीक्षा गर्छ ।‘ 

यो परीक्षा मात्रै नभई सिकाइसमेत रहेको डाक्टर जोशीले बताए । सन् २०२४ देखि नेपालका लागि नेपाल मेडिसिटीले निरन्तर रुपमा परीक्षा केन्द्रका रुपमा परीक्षा सञ्चालन गर्दै आएको छ । यो परीक्षामा उत्तीर्ण भएका चिकित्सकहरुले एमआरसीपी युकेबाट अनुमति पाएका जुनसुकै अस्पतालमा काम गर्न सक्दछन् । धेरै चिकित्सकहरूले यो परीक्षा लिन र एमआरसीपी युके योग्यता पूरा गर्नका लागि विदेशिने गरेको हुँदा यो परीक्षालाई सुरु गरेको पनि डाक्टर जोशीले बताए । तर, यसको आवश्यक ठानेर नेपालमा ल्याउने काममा भने डा. सत्यन राजभण्डारीले अग्रणी भूमिका निभाएका छन् । सुरुवातदेखि नै नपाल मेडिसिटीकी डा. प्रगति कोइरालाले यस परीक्षाको लागि समन्वयन गर्दै आएकी थिइन् । 

अब भने नेपालका चिकित्सकहरूलाई आफ्नै देशमा यो परीक्षा दिने वातावरण बनेको छ । ‘एमडीमा छिर्न निकै महँगो छ । तर यो परीक्षा त्यति महँगो छैन । यो अन्तर्राष्ट्रिय योग्यता पनि हो,’ जोशीले भने, 'एमबीबीएस गरेका थुप्रै विद्यार्थी यही परीक्षाका लागि विदेश जान थालेका कारण यो परीक्षालाई नेपालमा सुरु गरिएको हो ।‘