काठमाडौँ — स्वास्थ्य तथा जनसंख्या मन्त्रालय, स्वास्थ्य आपतकालीन तथा विपद व्यवस्थापन इकाईले पृथ्वी राजमार्गको मुग्लिन- नागढुंगा क्षेत्रभित्र पर्ने १६ निजी, सहकारी तथा सरकारी अस्पतालहरुका साथै सशस्त्र प्रहरी बल अस्पताल, बलम्बु तथा कुरिनटारमा आकिस्मक कक्षमा कार्यरत चिकित्सक तथा स्वास्थ्यकर्मीहरु गरी २५ जनालाई आधारभूत आकस्मिक स्याहार–‘बीईसी’ तालिम प्रदान गरेको छ । 

सात दिनको तालिममा राजमार्ग क्षेत्रमा दुर्घटना हुँदा चोटपटक लागेकाहरूको उद्धार तथा आकस्मिक उपचारका बारेमा व्यवहारिक ज्ञान दिइएको थियो । स्वास्थ्य आपतकालीन एवं विपद व्यवस्थापनका प्रमुख डा. प्रकाश बुढाथोकीका अनुसार आपत्कालीन अवस्थामा स्वास्थ्योपचार गर्दा अपनाउनुपर्ने सजगतालाई थप सुदृढ गर्नका लागि चिकित्सक तथा स्वास्थ्यकर्मीहरूलाई तालिम प्रदान गरिएको हो । ‘चिकित्सक तथा स्वास्थ्यकर्मीहरूलाई आकस्मिक उपचारको ज्ञान त हुने नै भयो । तर, यस प्रकारको तालिमलाई उहाँहरूको सीपलाई थप चुस्त बनाउन मद्दत गर्छ,’ उनले भने, ‘यो तालिमले उपचार मात्रै नभएर बिरामीलाई सुरक्षित रुपमा कसरी रेफर गर्ने भन्ने बारे पनि सिकाएको छ ।’ उनका अनुसार इकाईले हालसम्म आकस्मिक कक्षमा कार्यरत ९०१ ज्ना चिकित्सक तथा स्वास्थ्यकर्मीहरूलाई तालिम प्रदान गरिसकेको छ ।