चितवन — विश्वमा देखिएका नयाँ रोगहरुमध्ये ७० प्रतिशत जनावरबाट मानिसमा सरेर आएका अधिकारीहरुले बताएका छन् । जुनोटिक रोगको जोखिम न्यूनीकरणका लागि ‘एक स्वास्थ्य अवधारणा’ विषयक अन्तर्क्रिया कार्यक्रममा सहभागी विज्ञहरूले विश्वमा करिब ७० प्रतिशत रोगहरु जनावरबाट मानिसमा सरेको दाबी गरेका हुन् । 

पछिल्लो समय देखिएका कोभिड १९, इबोला, मर्स, रेविज जस्ता संक्रामक रोगहरु जनावरबाट मानिसमा सरेको उनीहरूको भनाइ छ । 

सरुवारोग अस्पताल टेकुका वरिष्ठ चिकित्सक डा. शेर बहादुर पुनले जुनोटिक डिजिजको जोखिम भएको बताए । जनावरबाट मानिसमा सर्ने रोगलाई जुनोटिक डिजिज भनिन्छ । पछिल्लो समय स्यालले टोकेका बिरामीहरुको संख्या बढ्दो क्रममा रहेको पुनले बताए । बिगतमा मान्छे देख्दा भाग्ने स्यालहरु अहिले हुलमा आक्रमण गर्न हिँडिरहेका छन् । 

डा. पुनले पछिल्लो समय अस्पतालमा कुकुरले टोकेर आउने मानिसको संख्यामा पनि बृद्धि भएको बताए  । ‘अहिले सरुवा रोग अस्पतालमा ९१ प्रतिशत मानिस कुकुरले टोकेर आउंँछन् भने ५ प्रतिशत मान्छे बांँदरले टोकेर आएका छन्,' उनले भने ।

त्यस्तै, पशु चिकित्सक डा. सविना मिश्राले पनि कुकुर भन्दा स्यालको जोखिम बढेको बताइन् । चितवनमा स्याल हुल बाँधेर हिड्ने र मान्छेलाई टोक्ने गरेको मिश्राले सुनाइन् । स्यालको टोकाइबाट रेविजको जोखिम अत्याधिक बढेका मिश्राको भनाइ छ । 

अध्ययनहरुका अनुसार विश्वमा हरेक रात ८ करोडभन्दा बढी मानिस भोकै सुत्छन् । त्यति मात्र हैन, विश्वमा अहिले जति मासुको आवश्यकता छ,  २०५० सम्ममा त्यो दर ७० प्रतिशतले वृद्धि हुने देखिएको छ । तर, जनावरमा देखिएको रोगका कारण उत्पादन दर २० प्रतिशतले घटिरहेको छ ।