पोखरा — जिल्ला प्रशासन कार्यालय कास्कीले शनिबार र आइतबार अति भारी वर्षाको सम्भावना रहेकाले रात्रिकालीन सवारी सञ्चालन नगर्न र सर्वसाधारणलाई उच्च सतर्कता अपनाउन आग्रह गरेको छ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरण र जल तथा मौसम विज्ञान विभागको मौसम पूर्वानुमानका आधारमा प्रशासनले जरुरी सूचना जारी गर्दै सम्भावित बाढी, पहिरो र डुबानबाट हुन सक्ने जनधनको क्षति न्यूनीकरणका लागि विभिन्न सावधानी अपनाउन अनुरोध गरेको हो । प्रशासनका अनुसार साउन २ र ३ गते मनसुन सक्रिय भई नेपालका मध्य तथा पश्चिमी भूभागमा भारी वर्षा हुने सम्भावना छ । कास्कीसहित गण्डकी प्रदेशका विभिन्न जिल्लामा भारीदेखि अति भारी वर्षाको जोखिम रहेकाले अनावश्यक रूपमा घरबाहिर ननिस्कन र लामो दूरीको यात्रा नगर्न आग्रह गरिएको छ । 

सूचनाअनुसार कास्कीबाट छुट्ने तथा कास्की भित्रिने रात्रिकालीन सवारी साधन शनिबार साँझ ७ बजेदेखि आइतबार बिहान ६ बजेसम्म सञ्चालन नगर्न अनुरोध गरिएको छ । त्यसैगरी पोखराबाट ग्रामीण क्षेत्रमा जाने सवारीसाधन पनि साँझ ६ बजेदेखि बिहान ६ बजेसम्म सञ्चालन नगर्न प्रशासनले आग्रह गरेको छ ।

प्रशासनले नदी, खोला तथा खोल्साको किनारमा नजान, बाढी र पहिरोको जोखिम भएका स्थानमा बसोबास गर्ने परिवारलाई सुरक्षित स्थानमा सर्न तथा जल तथा मौसम विज्ञान विभागबाट जारी हुने पूर्वानुमान र पूर्वसूचनालाई नियमित रूपमा पालना गर्न पनि आग्रह गरेको छ । विपद् पूर्वतयारी तथा उद्धारमा संलग्न सबै निकायलाई जिल्ला विपद् व्यवस्थापन समिति र स्थानीय विपद् व्यवस्थापन समितिसँग समन्वय गरेर तयारी अवस्थामा रहन निर्देशन दिइएको छ ।