गोरखा — वन क्षेत्र अतिक्रमण गरी बनाइएका गोरखा नगरपालिका–११ स्थित बाह्रकिलो बजारका टहरा हटाउन अटेरी गरेपछि पुनः सात दिनको समय सीमा तोकेर अतिक्रमित जग्गा खाली गर्न निर्देशन दिइएको छ । 

डिभिजन वन कार्यालय गोरखाले बुधबार सात दिनको समय सीमा तोकेर संरचना खाली गर्न निर्देशन दिएको हो । असार ३० गतेभित्र अतिक्रमित जग्गाका संरचना नहटाए स्थानीय प्रशासन तथा सरोकार राख्ने निकायसमेतको समन्वयमा आवश्यक बल प्रयोग गरेर हटाउने डिभिजन वन कार्यालय गोरखाका प्रमुख मदन मोहन शान्डिल्यले बताए । 

ओखले पाखा सामुदायिक वन उपभोक्ता समूहले असार ७ मा १३ गतेसम्मको समय सीमा तोक्दै अतिक्रमित क्षेत्र खाली गर्न दिएको निर्देशन यसअघि स्थानीयले अटेरी गरेका थिए । बुधबार पुनः डिभिजन वन कार्यालय गोरखाले असार ३० गतेभित्र संरचना हटाउन निर्देशन दिएको हो । अटेरी गरेर संरचना नहटाए वन क्षेत्र खाली गर्ने तथा वाधा विरोध गर्ने व्यक्ति र संस्थालाई वन ऐन, २०७६ बमोजिम हदैसम्मको कारबाही गरिने पनि कार्यालयले जनाएको छ ।

सामुदायिक वन क्षेत्रभित्र रहेको अवैध संरचना खाली गराउन पटक–पटक अनुरोध गर्दासमेत संरचना सम्बन्धित व्यक्तिहरूले नहटाएको शान्डिल्यले बताए । वन ऐन, २०७६ बमोजिम  राष्ट्रिय वन क्षेत्रमा निषेधित कार्य गरेको पाइएकाले ७ दिने सूचना जारी गरी वन क्षेत्रको जग्गा खाली गर्न भनिएको उनले बताए । 

बारपाक सडकको प्रवेशद्वार वाह्रकिलो बजारमा ओखले पाखा सामुदायिक वन समूहको जग्गाभित्र ३० भन्दा बढी टहरा बनाइएका छन् । दुई दशकअघिबाट बाह्रकिलोको वन क्षेत्रका जग्गामा पक्की संरचना निर्माण गरी पसल व्यवसाय संचालन हुँदै आएको छ । बाह्रकिलो बजारमा वन क्षेत्र मिचेर बनाइएका पक्की संरचना भने २०७३ सालमा पनि हटाइएको थियो । तत्कालीन समयमा पक्की संरचना हटाइए पनि पुनः टहरा बनाएर बाह्रकिलोमा पसल व्यवसाय संचालन हुँदै आएको छ ।