बागलुङ — काठेखोला गाउँपालिका–८ को लेखानीमा दैनिक ३० जना बिरामी स्वास्थ्य संस्थामा आउँछन् । तीमध्ये हरेक दिन एक/दुई जना नसा सम्बन्धी समस्या भएका हुन्छन् । 

हरेक बिरामीलाई सदरमुकाम रिफर गर्न कठिन भएपछि वडाबासीले विभिन्न दाता खोजेर वडास्थित लेखानी स्वास्थ्य चौकीमै फिजियोथेरापी सेवा थालेका छन् । ३७ लाख रुपैयाँको लगानीमा वडाले ३ कोठाको भवन समेत बनाएको छ । यो भवनमा फिजियोथेरापी, किशोरकिशोरीमैत्री सेवा र स्तनपान कक्ष राखिएको छ । यहाँ भएको जनशक्तिबाटै थप सेवा पनि संचालन गरिने स्वास्थ्य चौकी प्रमुख लक्ष्मीप्रसाद निउरेले बताए । 

विद्यालय तहमा पढ्ने किशोरकिशोरीमा आउने शारिरीक परिवर्तनसँगै पर्ने समस्या, यौनरोग, किशोरीकालागि आइरन चक्की खुवाउने, महिनावारीका कारण आउने समस्या जस्ता विषयमा यहाँ परामर्श र औषधि वितरण समेत गरिने छ । पूर्वाधार निर्माणमा गण्डकी प्रदेश सरकारको सहयोग ल्याएको वडाले स्वास्थ्य चौकी व्यवस्थापन र औषधिलगायतको सेवा भने वडाको बजेटबाटै गरिने भएको हो । त्यसबाहेक किशोरकिशोरीको शरीरमा हेमोग्लोबिनको जाँच पनि गरिन्छ ।

यो स्वास्थ्य चौकीमा इन्चार्ज निउरेसहित प्रसूति सम्बन्धी तालिम प्राप्त एक अनमि, एक अहेब, प्रयोगशालाका प्राविधिकको जनशक्ति छ । अहिले पनि यहाँ२ जना स्वास्थ्यकर्मीको अभाव छ । ‘बसाइसराइले दैनिक आउने बिरामीको दर घटे पनि फिजियोथेरापी सेवा लिने बढेका छन्,’ निउलेले भने, ‘उनीहरुको सेवाकालागि यो केन्द्र बनाइएको हो ।’ हाड र नसा सम्बन्धी बिरामी बढ्न थालेको उनले बताए ।

हरेक वर्ष २ हजार ६ सय बढी बिरामीले यहाँबाट सेवा लिन्छन् । चालु वर्ष यहाँ २ हजार ५ सय बिरामीले उपचार सेवा लिइसकेका छन्् भने हरेक दिन ३ देखि ४ जना बिरामी फिजियोथेरापीको खोजी गर्दै आइपुग्ने गरेको निउरेले जानकारी दिए । उनीहरुलाई सदरमुकाम पठाउने गरेकोमा अब भने गाउँमै सेवा दिन सकिनेछ । उपचारमा आएकी द्रौपदी श्रीषले सेवा पाएर सदरमुकाम जान नपरेको बताइन् ।