लमजुङ — मनाङको मनाङ ङिस्याङ गाउँपालिका–४, हुम्डे नजिकै ङोरोडाँडामा आइतबार डढेलो लागेको छ । पिसाङबाट हुम्डेतर्फ जाने बाटैको डाँडाको जंगलमा डढेलो लागेको हो ।

डढेलोले साढे २ रोपनी वन क्षेत्र प्रभावित बनाएको अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय मनाङले जनाएको छ । एक्यापका प्राकृतिक स्रोत संरक्षण सहायक श्रीजित जोशीका अनुसार आइतबार बिहान ८ बजेतिर जंगलमा आगलागी भएको हो । त्यसपछि हुम्डेस्थित नेपाल प्रहरी, सशस्त्र प्रहरी, एक्यापका कर्मचारी र स्थानीय आगो निभाउन पुगेका थिए ।

भिरालो भू–भाग र नजिकै पानीको स्रोत नभए पनि समन्वयात्मक कार्य र समयमै गरिएको प्रयासबाट डढेलोलाई नियन्त्रणमा लिन सफल भएको उनले बताए । उनका अनुसार सुरक्षाकर्मी, एक्याप र स्थानीयसमेत गरी १८ जनाको टोली खटिएको थियो । एक्यापका अनुसार डढेलोले तालिसपत्र प्रजातिका रुखमा बढीमात्रामा असर परेको छ । डढेलो साँझ ५ बजेतिरमात्रै पूर्ण रुपमा निभेको उनले बताए ।