बागलुङ — गण्डकी प्रदेशका सबै नगर तथा आधारभूत अस्पतालहरुमा बागलुङको गलकोट नगर अस्पताल न्युनतम सेवा मापदण्ड (एमएसएस) मूल्यांकनमा प्रथम भएको छ । तोकिएका सूचकको मूल्यांकनमा ७१ अंक ल्याएर गलकोट प्रथम भएको अस्पतालका प्रमुख डा. राजेश पौडेलले बताए ।

गलकोट नगरपालिका ५ स्थित अस्पतालको सुशासन तथा व्यबस्थापन, क्लिनिकल सेवा व्यवस्थापन र स्वासथ्य संस्था सहयोग व्यवस्थापन लगायतको सूचकमा अस्पतालले उक्त अंक पाएको हो । 

प्रदेश जनस्वास्थ्यको आयोजना, प्रदेश जनस्वास्थ्य केन्द्र पोखराको समन्वय र निक साइमन इन्स्चिट्युटको सहयोगमा सबै अस्पतालको अध्ययन गरिएको थियो । उक्त अध्ययनबाट गलकोट प्रथम भएको प्रदेश जनस्वस्थ्य कार्यालय बागलुङका निरीक्षक देवप्रकाश घिमिरेले जानकारी दिए ।

विशेषगरी आधारभूत सेवा दिनकालागि संस्थाको राम्रो र सुधार्ने पक्षलाई यो अध्ययनमा राख्ने गरिन्छ । सफ्टवेयर सूचकमा रहेर हरेकको नम्बर दिने व्यवस्था छ । सो आधारमा आउने अंक, सेवा प्रवाह समेतलाई हेरेर प्रथम छुट्टयाउने व्यवस्था छ । 

चार वर्षअघि स्थापना भएको यो अस्पतालमा दैनिक १ सय ५० देखि १ सय ८० जना सम्म बिरामीको उपचार गरिँदै आइएको छ । त्यसबाहेक अस्पतालमा दर्जनौं सेवा थपिएका छन् । 

गत असोजदेखि यो अस्पतालमा अपरेसनसहितको सुत्केरी सेवा पनि संचालनमा छ । गलकोट समाज युकेको सहयोगमा १२ लाख संकलन गरी फिजियोथेरापी कक्ष संचालन गरिएको छ भने अस्पतालमा पोष्टमार्टम सेवा समेत छ । प्रसूति सेवाकालागि पनि नियमित गर्भवतीहरु आउन थालेपछि यहाँ प्रसूति प्रतिक्षा घर बनाइएको छ ।  सेवाग्राही र आफन्तहरुले होटल खोज्न नपर्ने गरी तीनकोठे कुरुवा घर पनि बनाइएको हो । 

यहाँ सुत्केरी हुनुअघि गर्भवती र उनलाई सघाउने साथी समेत बस्न मिल्नेछ । कोठा सँगै खाना पकाउने सामाग्री, चुल्हो पनि छ । रातको समयमा आए पनि खाना पकाएर खान पाउने व्यवस्थासहित गलकोट नगरपालिका र यहाँ संचालित सम्बोधन परियोजनाले ४ लाख र नगरपालिकाले ८ लाख गरी १२ लाख खर्चेर भवन बनाइदिएको हो । यो अस्पतालमा गलकोट नगर बाहेक ताराखोला र बडिगाड गाउँपालिकासहित गुल्मीको मुसिकोट नगरपालिकाबाट पनि बिरामी आउने गर्छन् । अपरेसन गर्ने बिरामी पनि आउने भएपछि बिरामीको कुरुवा समेत आएर बस्न पाएका छन् ।