पोखरा — बौद्धिक अपाङ्गता भएका एक व्यक्तिलाई सार्वजनिक बसले नरोकी अघि बढेको घटनामा सम्बन्धित सवारी साधनलाई कारबाही गरिएको छ ।

जिल्ला प्रहरी कार्यालय कास्कीका अनुसार पोखरा महानगरपालिका–३२, लेखनाथका एक बौद्धिक अपाङ्गता भएका व्यक्तिले सार्वजनिक सवारी साधन रोक्न खोज्दा बस नरोकी हिँडेको भिडियो सामाजिक सञ्जालमा सार्वजनिक भएको थियो । उक्त व्यक्तिले सम्बन्धित निकायको ध्यानाकर्षण गराउने उद्देश्यले भिडियो पोष्ट गरेका थिए ।

घटनाप्रति गम्भीर ध्यानाकर्षण भएको जनाउँदै जिल्ला प्रहरी कार्यालय कास्कीले आवश्यक खोजतलास तथा कारबाहीका लागि जिल्ला ट्राफिक प्रहरी कार्यालय कास्कीमा पत्राचार गरेको थियो ।

प्रहरीका अनुसार अनुसन्धानका क्रममा ग२ख २२५५ नम्बरको सार्वजनिक बसलाई नियन्त्रणमा लिई आवश्यक ट्राफिक जरिवाना गरिएको छ । साथै, चालक तथा सम्बन्धित पक्षलाई आगामी दिनमा अपाङ्गता भएका व्यक्ति तथा ज्येष्ठ नागरिकलाई विशेष प्राथमिकता दिनुपर्ने विषयमा सम्झाइबुझाइ गरिएको छ ।

उक्त सवारी साधनका प्रतिनिधिले भविष्यमा यस्ता व्यक्तिहरूप्रति विशेष संवेदनशीलता अपनाउने प्रतिबद्धता जनाएपछि आवश्यक प्रक्रिया पूरा गरी सवारी साधन छाडिएको प्रहरीले जनाएको छ ।