पोखरा — पोखरा बहुमुखी क्याम्पसले यही १५ र १६ जेठमा ‘व्यवस्थापन तथा सामाजिक विज्ञानमा उदाउँदा प्रवृत्तिहरू’ सम्बन्धी दुई दिने राष्ट्रिय अनुसन्धान सम्मेलन आयोजना गर्ने भएको छ ।

२०४४ मा पुरानो टुँडिखेलबाट शैक्षिक यात्रा सुरु गरेको यस सामुदायिक क्याम्पसले आफ्नो संस्थागत सुदृढीकरण र अनुसन्धान संस्कृतिको प्रवर्द्धन गर्ने उद्देश्यले पहिलोपल्ट यस्तो सम्मेलन गर्न लागेको हो । विश्वविद्यालय अनुदान आयोगको सहयोग तथा पोखरा विश्वविद्यालय, गण्डकी विश्वविद्यालय, थाइल्याण्डको सिनावत्रा विश्वविद्यालय र मुक्त फाउन्डेसन नेपालको सहकार्यमा सम्मेलन हुन लागेको बुधबार आयोजित पत्रकार सम्मेलनमा जानकारी दिइयो ।

सम्मेलनमा नेपालसहित तीन देशका ७ वटा विश्वविद्यालय र २१ वटा क्याम्पसका ७८ जना अनुसन्धानकर्ताहरूले सहभागिता जनाउने र विभिन्न विधाका ५४ वटा अनुसन्धान पत्रहरू प्रस्तुत हुने क्याम्पसले जनाएको छ ।

सम्मेलनमा हरित व्यवस्थापन, डिजिटल बैंकिङ, दिगो वित्त, मानव संसाधन व्यवस्थापन, स्थानीय शासन, सामाजिक तथा सांस्कृतिक रूपान्तरण, सार्वजनिक नीति र वातावरणीय न्याय जस्ता समसामयिक विषयहरूमा गहन छलफल हुनेछ । २०८२ मा विश्वविद्यालय अनुदान आयोगबाट गुणस्तर सुनिश्चितता तथा प्रत्यायन (क्यूएए) प्रमाणपत्र प्राप्त गरिसकेको यस क्याम्पसले शिक्षण सिकाइसँगै अनुसन्धान र ज्ञान उत्पादनलाई प्राथमिकतामा राखेर यो कदम चालेको हो ।

सम्मेलनका संयोजक सह–प्राध्यापक भीमप्रसाद न्यौपानेले प्राज्ञिक बहसलाई समाज र उद्योगसँग जोड्न यो सम्मेलन कोसेढुङ्गा सावित हुने दाबी गरे । 'शैक्षिक संस्थाहरू केवल कक्षाकोठाको शिक्षणमा मात्र सीमित नभई अनुसन्धान र ज्ञान उत्पादनको केन्द्र बन्नुपर्छ भन्ने हाम्रो मान्यता हो,' उनले भने, 'व्यवस्थापन र सामाजिक विज्ञानका समसामयिक मुद्दाहरूमा नीतिगत संवाद गराउँदै विश्वविद्यालय, समुदाय र उद्योगबीचको सहकार्यलाई मजबुत बनाउनु नै यो सम्मेलनको मुख्य उद्देश्य हो ।'