प्रत्येक स्थानमा ट्रयाप क्यामेरा ७ दिनसम्म राखेर त्यसपछि नयाँ स्थानमा सारिने पनि उनले बताए । ‘क्यामेरा ७ दिन एक स्थानमा राखेर अर्को स्थानमा सार्ने प्रक्रियालाई एक महिना सम्म निरन्तरता दिन्छौं,’ उनले भने । स्थानीयसँग समन्वय गरेर यसअघि बढी घटना भएका क्षेत्र पहिचान गरेर क्यामेरा राखिएको छ । 
अध्ययन पछि चौपायमाथि हुने आक्रमणमा संलग्न प्राजातिको पहिचानमा सहयोग पुग्ने ओझाले बताए ।

अध्ययनबाट प्राप्त तथ्यंकले मानव–वन्यजन्तु द्वन्द्वको वास्तविक कारण पहिचान गरी प्रभावकारी नीति निर्माणमा सहयोग पुग्ने उनले बताए । ‘स्थानीयको जनजीविका र वन्यजन्तु संरक्षण बीच सन्तुलन कसरी कायम गर्ने अध्ययन पछि केही थाहा हुन्छ,’ उनले भने । अध्ययनले छाडा कुकुरको गतिविधि मात्र नभइ हिउाचितुवा, हिमाली ब्वाँसो, हिमाली भालुजस्ता वन्यजन्तुको अवस्थाबारेमा पनि वुझ्न सघाउ पुग्ने उनले बताए। 
चालु आर्थिक वर्ष सामागाउँ र साम्दो क्षेत्रमा मात्र अध्ययन गर्ने एमक्यापको योजना छ । ‘मानव–वन्यजन्तु द्वन्द्वको समस्या वडा ७ को छेकम्पार तथा तल्लो क्षेत्रमा पनि छ,’ उनले भने,‘अन्य क्षेत्रमा पनि क्रमशः अध्ययन गर्दै जान्छौं ।’ सामागाउँ र साम्दो क्षेत्रमा अध्ययनका लागि दुइ प्राविधिकसहित ५ जना खटिएको पनि ओझाले बताए । ‘पहिलो चरणमा राखेको १८ वटा क्यामेरको रिजल्ट के आउँछ, त्यसलाई अध्ययन गर्दै स्थानीयसँग छलफल गरेर यसअघि घटना भएको क्षेत्रलाई आधार मानेर क्यामेरा सार्छौं,’ उनले भने ।