गोरखा — लार्के सडक खण्ड अन्तरगत धार्चे गाउँपालिका–७ लापुस्थित नौलीखोलाको मोटरेबल पुलको निर्माण सम्पन्न भएको छ । २०७९ बाट निर्माण सुरु भएको पुल दुई पटक म्याद थप पछि बल्ल निर्माण पूरा भएको हो । 

पुल निर्माण पूरा भएसँगै आइतबारबाट सवारी चल्न सुरु भएको पूर्वाधार विकास कार्यालय गोरखाका इन्जिनियर मोहन श्रेष्ठले बताए । ‘साइडमा वाल लगाउने थोरै मात्र काम बाँकी छ, अरु निर्माण पूरा भएर गाडी चल्न थालेको छ,’ उनले भने । 

३५ मिटर लम्बाई र ८.४० मिटर चौडाइको पुल निर्माणका लागि ४ करोड ३५ लाख लागत लागेको उनले बताए। २०८१ असारभित्रै काम सक्ने गरी २०७९ साउनमा पुल निर्माणको जिम्मा सूर्योदय कन्ट्रक्सनले लिएको थियो । समयमै निर्माण पूरा नभएपछि म्याद थप गरेर पुल निर्माण गरिएको उनले बताए । ‘डाइभर्सन पनि छैन, यो ठाउँमा बर्खाको बेला काम गर्न समस्या भयो, ६ महिना काम नहुँदा पूरा हुन थप समय लाग्यो,’ उनले भने ।