गोरखा — सहकारी संस्था चोरी गर्ने उदेश्यले सहकारीका सुरक्षा गार्डमाथि आक्रमण गर्ने दुईजनालाई प्रहरीले पक्राउ गरेको छ ।

आरुघाट गाउँपालिका–१० घर भइ चितवन भरतपुर महानगरपालिका–११ कमलामाई बस्ने ४२ वर्षीय अम्बिर ढकाल र बाग्लुङको काठेखोला गाउापालिका–३ घर भइ नवलपरासीको सुनवल नगरपालिका–१३ बस्ने ३९ वर्षीय पदमबहादुर भण्डारीलाई पक्राउ गरेको जिल्ला प्रहरी कार्यालय गोरखाका प्रहरी निरीक्षक सरोज कार्कीले बताए । चितवन र नवलपरासी प्रहरीसँग समन्वय गरेर उनीहरूलाई पक्राउ गरिएको हो । 

६ बैशाखमा आरुघाट गाउँपालिका–१० मंगलटारमा रहेको सप्तकोशी बचत तथा ऋण सहकारी संस्था लिमिटेडको ढोकामा लगाइएको ताला तोडेर सहकारी संस्थाभित्र प्रवेश गरी उनीहरूले सुरक्षागार्ड छविलाल ढकाललाई आक्रमण गरेका थिए । ‘सहकारीभित्र छिरेलगत्तै सुरक्षागार्डलाई देखेपछि उनीहरूले सुरक्षागार्डलाई नै आक्रमण भएको रहेछ,’ उनले भने, ‘सुरक्षागार्ड देखेपछि आक्रमण गरेर भागेको देखिन्छ, चोरी भने हुन पाएन ।’