नवलपरासी — गण्डकी प्रदेश र भारतीय सीमा जोड्ने त्रिवेणी नाकामा स्वास्थ्य सहायता कक्ष भवन निर्माण अलपत्र परेको छ ।

त्रिवेणी भन्सार नाकामा रहेको पक्की सडकमा ७ वर्षदेखि त्रिपाल टाँगेर स्वास्थ्यकर्मीले दिनहुँ काम गर्दै आएका छन् । भारतबाट नेपाल भित्रिने स्थानीयको मलेरिया, एचआईभी र डेंगु संक्रमणको स्वास्थ्य परीक्षण हेल्थ डेस्क स्थापना गरेर हुँदै आइरहेको छ ।

त्रिवेणी नाकामा नेपाल प्रहरी र सशस्त्र प्रहरीको चेकपोस्ट छ । त्यसैको आडमा त्रिपालमुनि स्वास्थ्य सहायता कक्ष संचालन हुँदै आएको छ । यहाँ दैनिक बिहान ६ बजेदेखि साँझ ६ बजेसम्म भारतबाट आउनेको रगत जाँच गरिन्छ ।

सीमा नाकामा प्रवेश गर्नेहरूको अनिवार्य स्वास्थ्य जाँच गर्ने स्वास्थ्य मन्त्रालयको सर्कुलर छ । सीमा नाकामा दैनिक १२ घण्टा खटिने स्वास्थ्य सेवाका कर्मचारीको वर्षादेखि पक्की सडकमा टाँगिएको त्रिपालमुनि बास छ । पिच सडकमा टाँगिएको त्रिपालमा बसेर काम गर्दा कर्मचारी अप्ठ्यारोमा परेका छन् । चर्को घाम छ, शौचालयको समेत व्यवस्था छैन ।

यहाँ स्वास्थ्य सहायता कक्ष भवन निर्माणका लागि गण्डकी स्वास्थ्य मन्त्रालयले ५ लाख रकम विनियोजन गरेको छ । ‘हामीले सीमा नाकामा भवन निर्माण गर्न पहिलो चरणमा ५ लाख रकम विनियोजन गरेका छौं,’ प्रदेश सभा सदस्य तथा गण्डकी प्रदेशका स्वास्थ्यमन्त्री लक्ष्मणबहादुर पाण्डेले भने, ‘भवन निर्माणका लागि स्थानीय तहले तदारुकता नदेखाउँदा काम हुन सकेको छैन ।’