गोरखा — हावाहुरीले पालुङटार नगरपालिका क्षेत्रका दर्जनभन्दा बढी घरको छाना उडाएको छ । आइतबार साँझ असिना, पानीसहित आएको हावाहुरीले घरको छाना उडाएको हो । पालुङटार नगरपालिका–९ धुँवाकोट र मिरकोट तथा पौवाटारलगायतका क्षेत्रको दर्जनभन्दा बढी घरगोठको छाना उडाएको प्रहरीले जनाएको छ । 

पालुङटार–९ त्रिवेणी माविको छाना पनि हावाहुरीले उडाएको शिक्षक भुवन सेडाइँले जानकारी दिए । 'ठूलो हावाहुरी आयो, विद्यालयको प्रशासनिक भवनको छाना उडाएपछि कम्प्यूटरहरुमा क्षति पुगेको छ, अहिले पानी परिरहेकाले के-कति क्षति भयो भन्ने अवलोकन गर्ने अवस्था पनि छैन,’ उनले भने, 'यहाँ धेरै स्थानीयको घर, गोठको छाना पनि उडाएको छ ।’