नवलपरासी — बिस्तारको क्रममा रहेकाे महेन्द्र राजमार्ग अन्तरगत पूर्वी नवलपरासीमा पर्ने अरुण खोलामा निर्माण गरिएको पक्की पुल शुक्रबारदेखि संचालनमा आएको छ ।

निर्माण थालिएको करिब तीन वर्षपछि पक्की पुल निर्माणको काम सकेर शुक्रबारदेखि यातायात संचालन भएको हो । सडक आयोजना निर्देशनालयका प्रमुख इन्जिनियर चुडाराज ढकालका अनुसार पुल २ सय २० मिटर लामो यो पुल निर्माणको काम बिहीबार सकिएको हो ।

बिहीबार निर्माणको काम सकेर शुक्रबार दिउँसोबाट यो पुलमा गाडी चल्न थालेको ढकालले बताए। यसअघि यहाँ ५२ वर्षअघि निर्माण गरिएको फलामे पुलबाट यातायात संचालन हुँदै आएको हो । सोही पुलको छेउमा नयाँ निर्माण गरिएको हो । 

बुटवल-नारायणगढ सडक अन्तरगत यो पुल निर्माण भएको हो । बुटवल-नारायणगढ सडकको पूर्वी र पश्चिमी खण्डमा विभाजन गरेर चिनियाँ ठेकेदार कम्पनी चाइना स्टेट इन्जिजियरिङ कर्पोरेशनले गरिरहेको छ । अब यहाँ रहेकाे फलामे पुल हटाएर उक्त ठाउँमा अर्काे पक्की पुल निर्माणको काम गरिने छ । अब बन्ने पुलको काम बुटवल-नारायणगढ सडक योजना अन्तरगत नभइ भौतिक पूर्वाधार तथा यातायात मन्त्रालयको पुल महाशाखाले गर्ने छ ।