बागलुङ — चैते दसैंको अवसरमा बागलुङ कालिका मन्दिरमा हजारौं भक्तजन भेला भएका छन् । केही दिनदेखि नै दैनिक भीड लागेकामा बिहीबार हजारौंको भीड लागेको हो ।

बिहीबार २ लाख बढी भक्तजनले कालिका मन्दिरको दर्शन गर्ने र चैतेदसैंभर ५ लाख बढी भक्तजन आउने बागलुङ कालिका भगवती गुठी व्यवस्थापन समितिले अनुमान गरेको छ । बिहीबार बिहान ५ बजेदेखि दिउँसोसम्म पनि कालिका मन्दिरमा चार वटा लाइन बसेर सयौंले एकैपटक पूजा गरेका छन् । 

गुठीले एकैपटकमा धेरैलाई पूजा गर्न सक्ने व्यवस्थापन गरी कालिका मन्दिरका तीनवटै ढोका खुला गरिदिएको अध्यक्ष भूपेन्द्र खड्काले बताए । पूजासँगै कालिका मन्दिर आसपासमा लागेको मौलिक मेलामा पनि ठूलो भीड लागेको छ । 

यहाँ संचालित खुला पुरुष भलिबल, छेलो लगायतका प्रतियोगिता, दैनिक जीवनमा आवश्यक पर्ने ठेकी, डाला, नाङ्ला, कुटो–कोदालो, खुखुरी, खुँडाजस्ता सामग्री समेत बिक्रीका लागि राखिएको छ । वर्षभरि निर्माण गरिएका सामग्रीहरू ग्रामीण किसानले बेच्ने गर्छन् भने चैतेदसैंमा आउनेले ती सामान खरिद गरेर लैजाने चलन छ । झण्डै पाँच सय वर्षअघि स्थापना भएको बागलुङ कालिका मन्दिर (माई थान) मा लाग्दै आएको मौलिक मेलालाई गुठीले व्यवस्थापनको काम गरेको हो । 

सयौं सवारी साधनका कारण ट्राफिक जाम भएकाले जिल्लाको सुरक्षा निकायले सवारी व्यवस्थापनमा साथ दिएको छ भने सशस्त्र प्रहरी बलले यहाँ खानेपानीको व्यवस्थापन, नेपाल रेडक्रस सोसाइटी र सेनाको टोलीले प्राथमिक उपचार सेवा संचालन गरिरहेका छन् । शनिबारसम्म यो मेला लाग्नेछ । 

मेलाकै अवसरमा मौलिक दोहोरी, झाम्रे, सोरठी लगायतका गीत गाउने चलन छ । ठाउँठाउँमा मादल, खैजेरी बजाएर नाच्नेको पनि समूहहरू देखिएका छन् भने कालिका मन्दिर र आसपासमा भजनेहरू नाचेको देखिन्छ । सयौं पञ्चबलिसमेत यहाँ चढाउने गरिएकाले बलि व्यवस्थापन पनि गरिएको हो । 

चैते दसैं मेलालाई बजार झर्ने मौकाका रूपमा समेत यहाँका ग्रामीण क्षेत्रका बासिन्दाले लिने गरेका छन् । कामले फुर्सद नपाएका गृहिणीहरू पनि नाङ्लो, डाली र अन्य सामग्री किन्नका लागि समेत मेलामा आउने गरेको तमानखोलाकी वसन्ता घर्तीले बताइन् । यो मेलामा उनले गाउँगाउँबाट साथी, अभिभावक र छिमेकी बोलाएको बताइन् । राष्ट्रिय रूपमा ख्याति कमाएका वसन्त थापा, शिव परियार, प्रकाश सपुत, भूमिका गिरी लगायत कलाकार मेलामा आएका छन् ।