विपत् व्यवस्थापनको पूर्वतयारी र नागरिकको दैनिकीमा आइरहेको जटिलताबारे स्थानीय तहका प्रमुख तथा उपप्रमुख, सुरक्षा निकायका प्रमुख, सरोकार राख्ने सबै खाले कार्यालयका प्रतिनिधिसमेतले छलफल गरेर आगामी दिनमा कुनै पनि समस्या आउन नदिने गरी काम गर्ने प्रतिबद्धतासमेत जनाएका छन् । 

दैनिक उपभोग्य बस्तुको उपलब्धताबारेमा भने सक्दो प्रयास गरेर सहजीकरण गर्ने निर्णय गरेपछि हरेक पसल, फर्म र सम्भावित स्थलको सूक्ष्म अनुगमन भएको सहायक प्रजिअ नवराज बरालले जानकारी दिए । उनका अनुसार बजार अनुगमनलाई प्रभावकारी बनाउने, सदरमुकाम मात्र नभइ जिल्लाभरिका उपभोक्ताको अवस्था बुझ्ने, साना र ठूला व्यवसायीको गोदाम अनुगमन गरेर जनतालाई समतामूलक रूपमा सामग्रीको उपलब्धता गराउने निर्णय भएको बरालले बताए । 

पेट्रोलियम पदार्थको मूल्यमा भएको घटीबढीलाई लिएर जनतालाई सास्ती दिने काम नगर्न सल्लाह दिने निष्कर्ष निकालिएको बडीगाड गाउँपालिकाकी अध्यक्ष गण्डकी थापाले बताइन् । बजारमा मूल्य बढाउने, सामान नपाउने जस्ता काममा प्रशासनिक रूपमा सहजीकरण गरिनुपर्ने सुझाव पनि दिइएको उनको भनाइ छ । मूल्य बढ्ने र त्यसको तयारी स्वरूप अत्यावश्यक सामान नपाउने अवस्था भैरहेको सरोकारवालाको गुनासो छ ।