‘पर्वत जानलाई न तिथि हेर्नु पर्यो, न मिति,’ राष्ट्रियसभाका पूर्वअध्यक्ष गणेश तिमल्सिनाले भने, ‘फोनबाट मिडियासित कुराकानी नगरौं, आवश्यकताअनुसार आइहाल्छु ।’
What you should know
पर्वत — गत माघ ६ गते एमाले उम्मेदवार पदम गिरीले कार्यकर्ता र नेतासहित मुख्य निर्वाचन अधिकृतको कार्यालय पुगेर उम्मेदवारी दर्ता गराए । त्यसबेला एमाले कार्यकर्ताले राष्ट्रियसभाका पूर्वअध्यक्ष गणेशप्रसाद तिमल्सिना र संविधानसभा सदस्य विकास लम्सालको खोजी गरे । तर दुवै जना त्यहाँ उपस्थित थिएनन् ।
गिरीले एक साताअघि कुश्मा–३, दुर्लुङबाट घरदैलो अभियान सुरु गरेका छन् । तेस्रो जितको पर्खाइमा रहेका गिरीले त्यहाँ पनि आफ्नै अग्रज नेताको साथ पाएनन् । चुनावी अभियानमा तिमल्सिना र लम्साल देखा नपरेपछि पार्टीभित्र गुटले काम गरेको कार्यकर्ताको आरोप छ । यहाँका कार्यकर्ता एमाले केन्द्रीय सदस्य र जिल्ला इन्चार्ज गिरीले पार्टीमा प्रभाव मजबुत बनाएपछि तिमल्सिना र लम्सालको राजनीति छायामा परेको बताउँछन् ।
एमाले अध्यक्ष केपी शर्मा ओलीले गिरीलाई काखी च्यापेपछि तिमल्सिना र लम्साल जिम्मेवारीविहीन बनेको कार्यकर्ताको बुझाइ छ । मोदी–७ राम्जाका तिमल्सिना परिवारसहित पोखरामा बसिरहेका छन् । पदमा रहेका बेला गृहजिल्ला आइरहने उनी अहिले फर्किएका छैनन् । ‘पर्वत जानलाई न तिथि हेर्नु पर्यो, न मिति,’ राष्ट्रियसभाका पूर्वअध्यक्षले भने, ‘फोनबाट मिडियासित कुराकानी नगरौं, आवश्यकताअनुसार आइहाल्छु ।’
०७० मा एमालेको नवौं राष्ट्रिय महाधिवेशनबाट पोलिटब्युरो सदस्यमा निर्वाचित तिमल्सिना गण्डकी प्रदेश सह–संयोजक थिए । ०५४ मा तत्कालीन जिल्ला विकास समिति पर्वतको सभापति भए । ०७० को प्रत्यक्ष निर्वाचनमा पर्वत–१ बाट उम्मेदवार बनेका उनी कांग्रेसका अर्जुनप्रसाद जोशीसँग पराजित भएका थिए ।
एमालेको ११ औं महाधिवेशनमा पर्वतबाट तिमल्सिना र लम्साल प्रतिनिधि नै हुन पाएनन् । केन्द्रीय सदस्य गिरीको संयोजकत्वमा प्रतिनिधि छनोट समितिले उनीहरू दुवैलाई पाखा लगाएको थियो । पार्टीको जिम्मेवारीमा नभएकाले जिल्लामा भइरहेको चुनावी अभियानमा आफू देखा नपरेको लम्साल बताउँछन् । फागुन ४ गतेबाट मात्रै वैधानिक रूपले प्रचारप्रसारको काम सुरु हुने उनले बताए । ‘साथीहरूले आन्तरिक बैठक गर्नुभएको छ, म त्यसमा छैन,’ उनले भने, ‘अहिले चुनाव लाकै छैन, प्रचारप्रसारको समय भएकै छैन ।’
०७० को दोस्रो संविधानसभा निर्वाचनमा पर्वत–२ बाट विजयी लम्साल ०७४ मा प्रदेशसभा सदस्यको चुनाव लड्नुपर्ने भयो । तत्कालीन एमाले र माओवादी केन्द्रबीचमा भएको गठबन्धनको फाइदा गिरीलाई भयो । तिमल्सिना र लम्साल चुनावी मैदानमा नदेखिए पनि अनुगमन जिम्मेवारीमा बसेर काम गरिरहेको एमाले जिल्ला अध्यक्ष गोविन्द पहाडीले बताए । चुनावलाई केन्द्रमा राखेर १२–१५ जनाको टिम बनाएर काम भइरहेको उनले बताए ।
